Regional PRISAA Meet andam na
CEBU, Philippines - Anaa na sa 90 porsiyento nga andam ang Private Schools Athletic Association (PRISAA) alang sa Regional PRISAA Meet 2014 nga gitakda karong Pebrero 14-16 sa managlahing binyu dinhi sa Sugbu.
Adunay 15 ka sports events ug laing duha ka cultural events ang ipahigayon atol sa tulo ka adlaw nga kompetisyon sa mga tinun-an nga gikan sa mga pribadong tunghaan nga sakop sa Central Visayas Region.
Ang mga atleta naggikan sa 27 ka tunghaan dinhi sa rehiyon diin 14 niini ang gikan sa Bohol, 10 sa Sugbu ug tulo sa Dumaguete City.
Ang makampiyon sa maong kompetisyon maoy morepresentar sa Central Visayas alang sa National PRISAA didto sa Tagum City, Davao Oriental unya sa Abril 6-12.
Sa press conference kagahapon sa buntag didto sa opisina sa University of San Carlos Vice President for Academic Affairs nga si Fr. Adriano Ocariza, SVD, gipahibalo nga adunay nadugang nga lima ka events sa high school ug kini mao ang athletics, swimming for boys and girls, beach volleyball for girls, volleyball for girls ug chess.
Ang mga batted sports sama sa baseball ug softball paga-representahan sa Bohol PRISAA ug ingon man sab ang women’s basketball tungod kay wala'y team ang Cebu sa nahisgutang mga events.
Matud pa ni Bernard Ricablanca, sakop sa Central Visayas PRISAA secretariat nga makadawat ang Cebu PRISAA og Emmanuel Angeles award tungod sa talagsaon nga "grandslam." Ang CV PRISAA nidaog sa overall title sa tuig 2010, 2011, ug 2012.
Gipangulohan ni Regional PRISAA Fr. Vic Uy, SVD isip overall chairman, ang tema sa kompetiyon karong tuiga nagdala sa tema nga "Rising From Challenges Through Cultural and Sports Excellence." (BANAT NEWS)
- Latest
