CEBU, Philippines - Gipakuratan sa junior female cyclist nga si Ana Patricia 'Ica' Maximo sa YKKBikes.com ang iyang kaatbang dihang gisakmit niya ang unang dapit sa Golden Men B category atol sa pag-ulbo sa Chigo Criterium road cycling race kagahapon didto sa dakbayan sa Mandaue.
Ang grade 8 student sa Sacred Heart School-Hijas de Jesus nga mikabayo sa Ridley-Token rig, mipilde sa beteranong si Al Geyrozaga. Ang duha ka seklista parehong nakahuman sa 28-kilometer race sud sa usa ka oras, usa ka minuto ug 31 segundos. Si Rey Mahinay mi-okupar sa ikatulo nga dapit.
Sa laing bahin, ang paboritong si Rex Gonzales nidominar sa Golden Men A category, gisundan nilang Manny Talisay ug Haylin Bardaje alang sa ikaduha ug ikatulong puwesto.
"I didn't expect I can win. This is a good start for the year," matud pa sa 14-anyos nga si Icamax, kinsa midaog og duha ka medalya atol sa 2013 Philippine National Games (PNG) Junior Track Cycling Championships didto sa Amoranto Velodrome sa Quezon City.
Ang mosunod nga mga hugna sa Chigo Cycling series himuon sugod karong bulana ug ang series winners ipaila sumala pa sa Cebu MultiSport, ang event promoter. (BANAT NEWS)