CEBU, Philippines - Ang pagsakmit sa University of San Carlos (USC) Warriors sa kampiyonato sa 1st Inter-Collegiate Basketball Tournament didto sa Siquijor naghatag og mensahe nga andam na kini alang sa Cebu Schools Athletic Foundation Inc. (CESAFI) Season 13 nga sugdan sa Agosto 3 diha sa Cebu Coliseum.
Ang USC Warriors nidaog sa laing Cebu-based team University of San Jose-Recoletos (USJ-R) Jaguars, 74-54 atol sa championship game dili pa dugay didto sa Enrique Villanueva gym sa Siquijor.
Matud pa ni USC Warriors head coach Julian Macoy, nga ang duha nila ka Cameroonian recruits Ahmed Salihou ug Barry Amin moduwa sa team sa 13th season sa CESAFI.
"Medyo angat na, intact na ang team," matud pa ni Macoy.
Nasayran, ang USC Warriors niadto pang tuig 1958 nakakuha og kampiyonato ubos pa sa Cebu Amateur Athletic Association (CAAA) nga karon mao na ang CESAFI.
Si Macoy mapasalamaton usab kang Bogo City Mayor Celestino 'Junie' Martinez Jr., kinsa usa ka kanhi USC varsity player ug Jose Soberano III sa Land Masters Inc. sa ilang pagsuporta sa team.