Ang Bibliya sud sa Bibliya

Magpalahi usa ko sa akong tukion ning akong lindog karong adlawa. Espesyal man gud karong puntoha sa atong kinabuhi, hilabi na ngadto sa mga disipolo sa Romanhong Katoliko sa tibuok kalibotan. Kini kay atong gitimaan ang "Holy Week," paghinumdum kanato sa kasakit ug sakripisyo ni Hesukristo aron kita maluwas sa atong mga kasal-anan. Mao nang mahinungdanon kaayo kanato ang pagtimaan sa kabililhon ug kabalaan niining semanaha.

Kay hilig lagi ko mobasa og mga libro labi na may kalambigitan sa kasaysayan, tungod na sab sa impluwensiya sa akong amahan nga mipanaw na sa laing kalibotan, daghan ko'g mga butang nakat-onan sa dihang gamay pa ko. Apil na niini kun unsa ang gitawag nga "a city within a water" nga mao ang Venice ug ang "a city within a city" nga mao ang Vatican, kay ang sentro sa simbahang Katolika nahimutang man sud mismo sa siyudad sa Roma, ang capital sa Italya.

Mao nang nahingangha ko og maayo sa bag-ong pagtulon-an nga akong nakat-onan gikan ni Monsignor Roberto 'Boy' Alesna, ang kura paroko sa Cebu Metropolitan Cathedral. Ang gisabwag niyang mensahe hamubo apan hait kaayong mitaop sa akong dughan ug nasilsil og maayo sa akong alimpatakan nga bisan og ma-amnesia ko, simbako, dili gyud nako mahikalimtan.

* * *

Sa iyang wali atol sa misa nga iyang giselebrar tulo ka Domingo na ang milabay, gipadayag ni Monsignor Alesna ang kamahinungdanon sa nalatid sa John 3:16 sa balaang kasulatan nga nag-ingon, "For God so loved the world, that He gave his only begotten Son, that whosoever believeth in Him should not perish, but have everlasting life."

Ang maong bulawanong bersikulo nahubad na sa kapin sa usa ka libo ka mga linggwahe ug dialekto sa tibuok kalibotan. Nagkanayon si Monsignor Alesna nga mao gani kini ang gihimong tamdanan sa mga Theologians sa nagkadaiyang denominasyon sa pagtuo pagpaambit nila sa pulong sa Diyos ingon man sa pagsangyaw sa maayong balita ug pagpasabot sa katuyoan niini ngadto sa katawhan.

Mao na nga gisabwag ni Monsignor Alesna nga ang John 3:16 matawag nga "a Bible within a Bible" gumikan kay nagsomada kini sa duha ka Biblikanhong kamatuoran. Una, ang Ginoo mao mismo ang nangita og paagi nga kita maluwas sa atong mga kasal-anan ug ang ikaduha, iya kining gibuhat tungod sa dakung gugma niya kanato.

* * *

Ato kunong lantawon ang atong kasinatian sa atong kinabuhi. Dili ba bation kita og tumang kalipay nga dunay moagak kanato panahon sa kalisdanan? Kun kita problemado diin ang kalibotan daw midat-og kanato, dili ba mahupay ang atong kaguol kun dunay mopikpik sa atong abaga. Kun kita makasugat og kaaway, dili ba magaan ang atong dughan kun dunay modapig kanato? Unsa pa kaha ang atong bation kun dunay usa ka tawo, nga tungod sa sobrang paghigugma kanato, andam magpakamatay ug mopatulo sa iyang dugo aron mahugasan ang atong mga sala?

Mao kana ang gibuhat sa Ginoo alang kanato (Romans 5:8, Colossians 1:14, ug Isaiah 53:5-6)). Iyang gipakanaog ang bugtong niyang anak nga si Jesus aron kita maluwas sa atong mga kasal-anan ug sa ingon matul-id nato ang atong kinabuhi ubos sa paggiya sa hugot natong pagtuo sa atong langitnong Amahan (1 Peter 2:24).

Karon nga miabot na ang panahon nga kita maghinumdum sa pag-antus nga nahiaguman ni Hesukrito alang sa atong kaluwasan, angay natong panaminan ang atong kaugalingon kun duna ba kita nahimo nga nakapalig-on sa atong pagtuo sa Ginoo. Atong sutaon ug pamalandungan kun nagbaktas ba kita sa hustong dalan subay sa kabubot-on sa Ginoo nga atong agian.

Matud pa ni Arsobispo Jose Serofia Palma nga mahulog nga way kuwenta ang pagselebrar nato og "Holy Week" matag tuig kun wala kita'y kausaban alang sa kamaayohan nga ipatuman sa tagsa-tagsa nato ka kinabuhi. Matud pa ni Arsobispo Palma nga kun kita pangutan-on kun motuo ba kita sa Ginoo, sagad nga tubag 'oo'. Apan giunsa man nato pagpakita ug pagpadayag nga duna kita'y giyukboan nga Ginoo? Mao kana ang importante, pasabot pa ni Arsobispo Palma.

Seguro daghan ang naglibog kun unsaon nato pagsunod sa tiunay ug matuod nga Kristohanong kinabuhi. Sama kaninyo, dili ko perpekto ug daghan pud ko og kasaypanan nga nahimo sa kinabuhi. Seguro ang labing maayo natong buhaton mao ang pagtamod sa duha ka labing mahinungdanong sugo nga gusto ni Hesus nga atong pagasundon ug tumanon.

Una, higugmaa ang Ginoo sa tibuok nimong kasingkasing, sa tibuok nimong kalag, ug sa tibuok nimong huna-huna; ug ikaduha, higugmaa ang imong isig katawo sama sa paghigugma nimo sa imong kaugalingon (Matthew 22:36-40).

Kun dunay mga komentaryo o reaksiyon mahimong mo-email sa [email protected]. o [email protected].