Agwanta gyud ta

Luoy tawon kaayo ang mga ordinaryong kawani sa pribadong sektor nga wa gani sila mausbawi sa ilang sweldo, unya karon magsagubang na usab sa dugang gastohan kay usbawan man ang plitehan sa mga PUJ.

Ang mapahiyumon kaayo mao ang mga driver sa mga PUJ kay madugangan man sila’g P1 kada pasahero. Kon sa usa ka adlaw dunay 500 ka tawo nga makasakay sa ilang PUJ, ang ilang kita madugangan og P500.

Gipahibawo na sa Land Transportation Franchising and Regulatory Board (LTFRB) nga posible karong sunod buwan, mohatag sila’g pagtugot nga ang plitehan sa mga PUJ madugangan og P1.

Kabahin sa sweldo sa mga kawani, giduso unta sa Kongreso nga pun-an og P200 ang inadlaw nga minimum wage, apan wa maaprobahi kay ang Senado gusto ra nga ang idugang P100.      

Kon ako hinuo’y pahatagon og sugyot, bisan og P100 lang nga usbaw kada adlaw, maayo na kaayo. Kon imo gud nga himoong P200 ang increase sa sweldo kada adlaw, lagmit daghang agawon ang moundang sa negosyo.

* * *

Nindot ang kamandoan ni Department of Education-7 regional director Salustiano Jimenez nga dili lang pugson ang mga ginikanan nga pasul-obon gyud og school uniform ang ilang mga anak.

Nakasabot si Jimenez nga basin dunay maglisud sa pagpalit og mga school uniforms sa ilang mga anak, mao nga gimando niya nga dili pinugsanay ang pagpasul-ob og uniform.

Pero dunay mga ginikanan nga mas pabor nga mag-uniporme gyud ang ilang mga anak kay mas menos pa og gasto. Kon dili mag-uniporme kinahanglang daghan og sinena ang bata aron di magbalikbalik ang isul-ob.

Kon duna lay lima ka sinena nga nindot ang bata, mabantayan ni sa mga classmate nga nagbalik-balik ra ang gisul-ob, ug posible nga mogawas na sab ang pagpang-bully.

* * *

Dili katuohan ang gibutyag ni Presidente Bongbong Marcos nga sa dili pa matapos ning tuiga, mataoran na gyud og internet connections ang tanang public schools sa nasud.

Di gyud ko motuo niini, aw ingna ko nga bakakon kon ang tanang public schools mataoran na og active internet connections. Daghan man ganing mga dapit sa nasud nga way internet signal, unya mataoran na hinoon ang mga tunghaan?

Mao nay giingon “Tell that to the dead marines.” Ang maayong himoon sa kagamhanan, i-require niini nga ang mga telecomunications companies mopakusog gyud sa ilang signal, ilabi na ang data.

Kataw-an lang tawon ta sa mga langyaw nga makabisita sa atong nasud kay didto sa ila, pwerteng kusoga sa internet, apan dinhi sa Pilipinas bisan dinhi sa mga major cities, nagkamang ang internet signal.