Divorce
Aprobado na sa Ubos Balay Balauranan ang Absolute Divorce Bill. Sa boto nga 131 pabor, 109 supak ug 20 ang wala mobotar, napalabang ang House Bill Numero 9349.
Si Kongresista Edsil Lagman nga maoy amahan sa Absolute Divorce Act miingon nga ang paghimong legal sa divorcio sa Pilipinas miila kini sa panginahanglan sa paghatag og kapilian sa matag usa nga nasulod sa dili malipayon ug dilina mahilot nga relasyon sa kaminyoon.
Si Lagman nagkanayon nga isip nag-inusarang nasud sa kalibotan gawas sa Vatican nga pabiling gidiklarar nga illegal ang divorce, ang pag aprobar sa Ubos Balay Balauranan sa Absolute Divorce Act usa kini ka klaro ug makabungog nga kadaugan ug sinyales sa dinalian nga kagawasan sa mga asawang pinoy nga nalubong sa toxic, naabuso ug dugay nang patay nga kaminyoon.
Giklaro hinuon ni Lagman nga ang Balaudnon wala moila sa walay sayop, dinalian o daw sama sa drive thru nga panagbuwag, email o notarial nga divorce tungod kay ang panagbulag moagi pa kini sa makoti nga proceso sa husgado aron malikayan ang pag abuso ug panagsabot sa bana ug asawa.
Limitado usab ang mga basihanan sa absolute divorce sama sa psychological incapacity, dili na mahilot nga kasungian, domestic o abuso sa kaminyoon, kun ang asawa o bana mipaubos kini sa sex reassignment surgery ug panagbulag na sulod sa lima ka tuig.
Lakip usab sa gihimong basihanan sa absolute divorce ang mga basihanan sa legal separation ug annulment of marriage ubos sa Family Code of the Philippines.
Ang divorce usab nga nakuha sa magtiayon didto sa gawas sa nasud ilhon kini nga balido dinhi sa Pilipinas ug wala kinahanglana sa pag ila niini ang deklarasypn sa hukmanan dinhi sa nasud.
Ang divorce naglatid og 60 ka adlaw nga cooling-off period human kini mapasaka sa Family Court aron hatagan og kahigayonan ang magtiayon nga gustong magbuwag nga mahilot pa ang ilang bangi ug aron mahiusa pag usab.
Dili pa angayan nga magmaya ang mga pabor sa Absolute Divorce Bill tungod kay tukion ug lantugian pa kini sa Senado. Sa Senado dili pa igo ang gidaghanon sa mga senador nga pabor sa Divorce Bill. Angayan Dnga ikonsiderar sa mga pabor sa divorce bill nga ang bago nga presidente sa Senado nga si Chiz Escudero dili pabor sa Divorce Bill kun wala ko masayop.
* * *
Ako diay nga ipaabot ang akong pahalipay ngadto sa Cebu Metropolitan Cathedral Rondalla Choir nga nagsaulog sa ilang ika 45 ka tuig nga anibersaryo.
Ang Rondalla Choir gitukod kini sa mitaliwan na nga si Msgr. Manuel Salvador niadtong 1979. Nahimo akong sakop niini ug nagsilbing Presidente.
Happy 45th Anniversary Cebu Metropolitan Cathedral Rondalla Choir.
- Latest