EDITORYAL - Prebilihiyo sa PWDs ang hinungdan

Dunay nadiskubrehang gituohang binuang aning pag-isyu og mga person with disabilities (PWD) IDs ang Cebu City hall ug husto sab nga gihunong ang pag-imprinta niini ug pag-release niini.

Kun kaniadto dili madawat sa mga tawo kun dunay kakulian sa panglawas ug kun duna gani niini, ikauwaw pa sa uban kay lagi maputos man sab og pagtamay gikan sa mga hinawayon.

Apan sa pagdagan sa panahon anam-anam nga nadawat sa katilingban ug gisabot ang ilang sitwasyon.

Kaniadto ang PWD mao lang kadtong duna nay kakulian sa panglawas gikan pa lang sa ilang pagpanganak. Ang pagsabot kaniadto, kadto gyung mga tawo nga bakol, ug may kakulian sa pangisip sukad sa pagkabata.

Apan unsa man gyud diay aron matawag ang tawo nga usa na ka PWD? Daghan kini og kahulogan, depende kun unsa nga libro ang basihan, apan ang tanan pareho ra og gipasabot.

“Persons with disabilities are those suffering from restrictions or different abilities, as a result of a mental or sensory impairment, to perform an activity in the manner within the range considered normal for a human being, male or female,” matud pa sa usa sa mga mabasa diha sa internet.

Sa ato pa, bisan kinsa , edad, lalaki man o babaye basta dili makahimo o makabuhat sa makayang buhaton sa tawong walay kakulian sa panglawas o pangisip.

Gani, aron dili na sila tamayon o daug-daugon dunay mga balaod nga gipanday para sila maprotektahan ug mahatagan sab og oportunidad sama sa way mga kakulian.

Nalakip sa mga balaod mao ang mga prebilihiyo para kanila sama sa diskwento sa palaliton, ekslusibong mga transaksyon sa pribado man o sa gobiyerno ug mga ayuda gikan sa gobiyerno, basta makapakita lang og balidong PWD ID.

Apan mao man sab kini ang hinungdan nganong daghan ang miabusar, gani dunay uban nga bisan tuod og dili grabe ang kakulian ilabi na nakuha nila kini gikan sa sakit o aksidente ug dili sukad sa pagkabata, miyembro naman karon sa PWD.

Mao tingali nga posible gyud tinuod kining PWD ID for sale karon. Kang kinsa man ning sala? Ang nagprinta o ang nagpa printa nga walay kontrol sa pag release niini?