EDITORYAL - Espiya sa China?

Dakong tanghaga para sa mga Pilipino kining pagkatawo sa kontrobersiyal nga mayor sa Bamban, Pampanga nga si Mayor Alice Guo nga gigisal karon sa Senate inquiry may labot sa sindikatong naghimo og mga pekeng dokumento sa Pilipinas aron magamit sa mga Chinese nga nalambigit sa operasyon sa Philippine Overseas Gaming Operation (POGO).

Si Guo gigisal sa pangutana ni Senador Risa Hontiveros kabahin sa iyang pagkatawo gikan sa iyang pagkapanganak, birth certificate, medical ug school records ug kun giunsa niya pagkabaton og dakong propiyedad sa maong lungsod.

Ang iyang mga tubag sa Senado wala sab magkatukma sa mga tubag nga iyang gihatag sa interbyu ni Karen Davila sa ABS –CBN. Duna say mga pangutana nga gipili niyang dili nalang tubagon.

Lakip sa gikwestyon og maayo ang background sa iyang amahan nga siya mismo miangkong usa ka Chinese national ug sila dunay farm ug baboyan diha sa maong lungsod.  Matud ni Guo, wala siyay pormal nga edukasyon kondili home studying lang nga pribado, nagpagasabot lang nga wala gyud siya sukad nakasulod og lawak-saringan sa eskuylahan ug labaw na nga wala gyud siyay mga classmates.

Walay kasayoran ang DepEd sa iyang pageskuyla sukad sa iyang pagkabata ug labaw nang walay “classmates” nga makapamatuod nga tinuod o dili iyang mga gipangtubag sa Senado ug kang Davila.

Matud pa niya, anak siya sa iyang amahan sa katabang niini kaniadto. Apan walay rekord sa Philippine Statistics Administration ang iyang amahan ug inahan nga silangA ngelito Guo Amelia Leal nga sila kasado base sa nakabutang sa iyang birth certificate. Kusganon niyang giinsister nga siya usa ka Pilipino.

Nagsige siya og pangangkon nga probinsyana ra siya ug panguma ug pamuhi og baboy ilang panginabuhi, apan giangkon niya nga duna siyay helicopter.

Ang mga ingon niini nga matang sa mga pangutana dali ra man untang matubag ug tuohan, kana kun magkatukma lang tanan. Samut nga nakapaduda kay gilambigit siya sa POGO ug sa mga indibidwal nga dunay kasong money laundering sa nasud sa Singapore.

Kinsa man gyud ni si Mayor Alice Guo? Pila pa ka sama niya ang nia karon sa Pilipinas ug unsa ilang gibuhat ug papel? Nganong nakaugat man sila dinhi?