Pakauwaw ni Bato
Ambot unsay nakaaghat ni Senador Bato dela Rosa sa paglusad og imbestigasyon base sa way klaro nga kasayuran batok ni Presidente Ferdinand Marcos Jr. Human sa upat ka public hearings, nisamot kabantang nga way ideya ang senador unsa ang iyang padulngan.
Gisugdan ni dela Rosa ang imbestigasyon sa niaging buwan bisan way pormal nga reklamo nga nadawat, ni resolusyon nga napasar. Gitapos ang imbestigasyon gahapon nga ang kinakusgan niya nga tinubdan sa kasayuran gi-contempt ug gipa-priso sa iya ra sang gipangulohan nga Senate Public Order and Dangerous Drugs Committee.
* * *
Gipanghimakak ni dela Rosa nga gisugo sa kampo ni kanhi Presidente Rodrigo Duterte pagsusi sa giingong nabaraw nga operasyon sa Philippine Drug Enforcement Agency (PDEA) batok ni Marcos Jr. niadtong 2012. Nikumpisal si dela Rosa nga ang nakapakumbinser niya pagpangimbestigar mao ang usa ka pro-Duterte vlogger.
Kinsa gawas nga wa motahod sa iyang imbitasyon sa pagtambong sa public hearing nipasangil pa gyod nga wa magkadimao ang iyang imbestigasyon kay nahadlok sa presidente o nabayran ni First Lady Liza Araneta Marcos. Mas nasuko pa gyod niya ang mga loyalista ni Marcos.
* * *
Bisan ang ubang mga senador niawhag ni dela Rosa sa paghunong sa imbestigasyon nga way klarong sukaranan. Ambot kabahin ba sa sugo niya o natandog lang ang garbo, niinsistir siya nga magpadayon paghipos og dugang mga pamalibad sa uban pa niyang mga gipangimbitar nga nakapasamot sa ka-kadudahan sa iyang main resource person.
Labing klarong ebidensiya nga wa kasabot sa iyang pakisusi, wa mosupak si dela Rosa sa pagdeklarar og contempt sa prinsipal niyang tinubdan sa kasayuran.
* * *
Ang binuang nga imbestigasyon ni dela Rosa mahimong moresulta sa lahugay sa liderato sa Senado. Kay gibasol sa Malakanyang si Senate President Migz Zubiri nga kutob ra sa huyang nga mga pasumbingay pero napakyas sa pagbadlong ni dela Rosa.
Nakalahutay si Zubiri sa paglangay sa maniobra sa House of Representatives pag-apura ug pagpalusot unta sa charter change. Pero mahimo nga di makalingkawas sa pakauwaw ni dela Rosa. Si Senador Chiz Escudero, nga gikataho nga nakakuha na og 15 ka boto sa ilang kaubanan, gipaabot nga pormal nang mobanos isip bag-o nga presidente sa Senado karong semanaha.
* * *
- Latest
