Politika

Adunay duha ka dagway ang politika, maayo ug dautan. Ako kining gituki tungod kay gisugyot sa presidente sa Cebu City Association of Barangay Councils ug Kapitan sa Barangay Kasambagan Franklin Ong nga ang paghatag og tabang pinansiyal ngadto sa 80 ka Barangay sa dakbayan sa Sugbo ipalayo sa maniubra sa politika ug inpluwensiya. Kini human giawhag ni Ong ang iyang mga kaubanan sa konseho atol sa ilang session niadtong Mayo 15 nga ipagawas na ang salapi nga gigahin alang sa 80 ka mga Barangay sa dakbayan.

Apan giklaro ni Konsehal James Anthony Cuenco nga ang pulong “Barug” sa Resolution nga gisumitir ni Ong nagpasabot na nga adunay kolor politika sa paghatag sa tabang pinansiyal.

Ang lokal nga kagamhanan sa dakbayan sa Sugbo migahin og P400 milyones sa tuig 2024 niining gahin alang sa tabang pinansiyal sa 80 ka Barangay.

Sa memorandum nga gipagawas ni Mayor Mike Rama nga naglatid sa patakaran sa paggamit sa tabang pinansiyal nakasentro sa direksiyon sa patakaran nga iyang gitawag og “Barug Cebu City.”

Giingon sa mga konsehal nga ang Barug nagpasabot kini sa Partido Barug nga ang nagtukod og Presidente si Mayor Mike Rama. Kadaghanan sa mga konsehal kauban sa mayor sa miaging eleksiyon. 

Giawhag ni Cuenco si konsehal Franklin Ong sa pagpapas sa pulong Barug sa gisumitir niining Resolution. Iyang gipasabot nga ang pundo sa gobyerno kinahanglan nga dili magduso og partido politikal.

Apan gipasabot ni konsehal Franklin Ong ug konsehal Joy Pesquera nga ang pulong “Barug” acronym lamang nga aprobado na sa Executive Legislative Agenda (ELA). Gisugyot ni Pesquera nga usbon ang ELA nga giaprobahan niadtong 2022 kun usbon man gyod ang pulong “Barug.” 

Giklaro usab ni konsehal Rey Gealon nga ang memorandum sa mayor wala maghisgot og politika gani ang tanang 80 ka Barangay ang makadawat niini. Busa wala kini jolor sa politika.

Gipasabot ni Ong unsay ipasabot sa “Barug” nga agenda nga ang “B” business environment and employment opportunities, “A” adequate water supply, “R” resettlement and housing, “U” urban and upland development ug ang “G” good governance, public safety and resiliency.

Maayo kini nga dagway sa politika.