Mayor wa makauyon

Ang Cebu City Traffic Management Board giawhag ni Cebu City Acting Mayor Raymond Alvin Garcia nga pahimoon og resolusyon kabahin sa ilegal nga pagpamutang og signages sa Tokagawa nga kuno makapangolekta na sila og parking fees sa Domingo.

Kining isyuha apil nga hisgotan sa miting namo sa Cebu City Traffic Management Board karong hapon. Paminawon namo kon unsay gibasehan sa Tokagawa nga namutang na man sila og mga signages nga apil na ang Domingo nga sila makapangolekta.

Ang Tokagawa nga maoy nagdumala sa CEPMA maoy gitugyanan sa Cebu City government nga mangolekta og parking fees sa mga roadside parking sa mga pinili nga karsada. Dili sila makapataka lang pagpangolekta bisan asa, kay kinahanglang anaa kini sa Joint Venture Agreement nga ilang gipirmahan.

Bisan si Cebu City Councilor James Cuenco nga maoy chairman sa Committee on Transportation sa City Council miingon gyud nga wa sila mohatag og pagtugot sa Tokagawa nga mangolekta sila’g parking fees sa Domingo.

Labaw na nga wa tuguti ang Tokagawa nga mangolekta sila’g parking fees lapas sa alas 7 sa gabii. Klaro kaayo sa Joint Venture Agreement nga ang pagpangolekta og parking fees gikan lang sa alas 7 sa buntag hangtud sa alas 7 sa gabii.

Apan samtang wa pay pagtugot sa Cebu City government ang Tokagawa ug ang CEPMA, gipangilisan na nila ang mga signages aron makita sa mga motorista nga ang pagpangolekta og parking fees apil na ang Domingo ug hangtud sa alas 9 sa gabii.

Maluoy ko sa mga motorista nga giabusohan, kolektahan og parking fees nga unta, gituyo man sa Cebu City government nga ang Domingo pagsilbi nga “rest day” nga dili makabayad og parking fees ang mga tag-iya’g sakyanan nga moparking sa mga roadside parking.

Gibalik-balik nako pagtuki kining mao nga isyu isip paglaban sa mga motorista. Kon mangolekta ang Tokagawa sa adlaw’ng Domingo ug hangtud sa alas 9 sa gabii, tabla ra nga gusto nilang tilokon pagsakiyo ang sensiyo sa mga motorista. Unya, samtang modaku pag-ayo ang kita sa Tokagawa, ang Cebu City government makabahin lang og pwerteng gamaya nga bahin, nga matud sa Commission on Audit (COA), alkanse kaayo ang siyudad.

Gani, ang COA misugyot man nga i-terminate kun hunongon na kining mao nga kwestyonable nga kontrata. Awhag nako sa mga opisyal sa siyudad nga nagdupa-dupa niining mao nga kontrata, kon duna man, undang na tawon mo kay alkanse niini ang siyudad.

Bisan si Acting Mayor Garcia miingon gyud nako nga gustong niyang tan-awon pagbalik ang mao nga kasabotan nga  gihulagway sa COA nga “disadvantageous” sa siyudad.