Nagduha duha pa sa pagdakop sa unconsolidated PUJ

Niadtong Abril 30 pa ang deadline sa franchise consolidation sa mga public utility vehicles apil na niini ang mga traditional PUJ ug sukad niini maisip na nga kolorum sila ug dili na mamahimong mamasahero.

Apan nahatagan pa og laing 15 ka adlaw nga kahigayonan nga makadagan sa karsada kay nagpahigayon pa man og validation ang LTFRB kinsa gyud kadto ang mga nakatuman sa consolidation process ug kutob ra usab niadtong Mayo 15.

Mayo 16 nagsugod na sa pagpanakop ang mga impelementing agency apan wala may kisaw ilabi na sa mga unconsolidated PUJ kay mismo ang mga gitahasan sa pagpanakop naglibog pa man kay nagpaabot pa sila og go signal o unsa man ang ilang basehan sa pagpanakop sa mga PUJ.

Ang Land Transportation Office ug ang Highway Patrol Group pareho nga gitahasan sa pagsita sa mga unconsolidated puj matud sa Land Transportation Franchising and Regulatory Board apan ang naasoyng mga ahensya gusto lang og klaro nga giya nga maoy ilang tamdan aron malikayan sa mga posibleng technicalities nga ilang sagubangon ugaling adunay mga legal questions nga motumaw sanglit bag-o man kini nga development ang unconsolidation sa franchise.

Matud sa LTFRB nga dili sila ang manakop kay iya kini sa LTO ug HPG ug mamahimo na kining sugdan kay kolorum naman ang mga sakyanan nga wala ma-consolidate sama sa naandan nilang gihimo nga mopahigayon og mga operasyon.

Aron maseguro sila sa ilang himoon pangitaan nalang og mga dokumento sama sa resibo ug uban pa nga nagmatuod nga consolidated o ba kaha on process ang consolidation ug kadtong walay ikapakita matik na nga dakpon, sakmiton ang sakyanan ug i-impound dayon multahan nunot sa nahimo nga violation.

Sayon sultihon apan alang mga implementing agency gusto usab silang makaseguro nga dili sila masumbalikan.

Gani buot nila nga dunay personality gikan sa LTFRB nga  mouban sa higayon nga mopahigayon sila og operasyon batok sa mga unconsolidated PUV aron adunay specific guidance sa ilang pagabuhaton.

Tungod kay wala pa may klaro sa pagkakaron kanus-a pangdakpon ang mga unconsolidated PUJ maghatag kini og dugaang lugway sa naasoy'ng transport group nga makapamasahero pa sa kadalanan, apan dili mokompyansa tungod kay maimpound ang sakyanan ug mahal ra ba kaayo ang multa.

Hinuon sa Central Visayas ilabi na sa Sugbo dili man kaayo agresibo ang transport group dili sama sa kaulohan nga hangtud karon isog nga pakigbisog ang ilang gihimo kay gibarugan nila nga bugtong ang Kongreso lang ang makabawi sa ilang prangkisa.