Mas epektibo tinokhangay kay sa walay armasay

Dugay nang gibandilyo ni kanhi Presidente Rodrigo Roa Duterte (PRRD) nga kaaway niya ang illegal drugs kay hingpit kining moguba sa kaugmaon sa atong kabatan-onan ug sa umaabot pang mga bag-ong henerasyon. Hinungdan, natukod niya ang war on drugs (WOD) panahon sa iyang pagpamunoan, diin adunay druglords nga gidakop ug namatay sa mga engkuwentro. Kini walay labot sa mga gagmay nga nangalit-ad sa kadalanan tungod sa ilang pagsukol sa mga otoridad.

Paglingkod pa lang ni PRRD sa Malakanyang, himatikdan na sa katawhan ang hinayhinayng pagkahanaw sa mga adik-adik, hold-aper, isnatser ug ubang matang sa kriminal, diin gikalipay kaayo sa mga kawani sa call centers, casino, hotel ug uban pa, kinsa sagad, panggabii ang trabaho. Sanglit, wala nay manglabnot sa ilang bag, o molangkat sa mga gipangsul-ob nilang alahas.

Sa tanang pro-illegal drugs, kinsa miakusar ni PRRD nga extra-judicial killings ang iyang WOD, gipakasama nila siya nga kriminal ug nagpatabang pa sila sa International Criminal Court aron kini dakpon-madugta sulod sa prisohan. Pero walay nalapas sa balaod si PRRD. Puthaw ug sobra kahait iyang political will. Busa, walay Trillanes-Hontiveros-de Lima ug Commission on Human Rights ang nakadulot!

Niining bag-o mihimog propaganda si PBBM pinaagi sa Batangas P13.3B-1.8 tons-shabu ‘nab me controversy’, aron ipatuo sa katawhan nga mahimo ra gyud ang pagdakop og tinoneladang shabu gikan sa wala mailhing druglords, nga walay kinabuhing mausik. Dili sama sa kang PRRD nga daghang dugo ang mibanaw sa karsada.

Dinhi makita, kinsa nila ni PBBM ug PRRD ang may deperensiya sa panghunahuna? Tinuoray, daghang nangamatay sa W0D ni PRRD. Pero silang gipamatay pulos daotang sagbot o notadong kriminal. Busa, mapugngan ang ilang pagpamatay sa mga inosente.

Samtang sa kang PBBM, ang mga daotang sagbot dili niya patyon. Diin, moresulta ngadto sa mas daghan pang mangamatayng inosente, human among-amongi sa maong mga adik-adik, kansang utok naturiring na, diin ultimong igsuon unayon sa paglugos-patay.

Sa social media, mibaha ang mga pagdayeg ug gipangmingaw sa WOD ni PRRD. Tungod kay sila buhing saksi, nga mas epektibo ang kang PRRD nga tinokhangay, kay sa kang PBBM, nga walay armasay!

Maong naglibog sila, nganong pinangga man ni PBBM ang mga daotan?