Wala'y ipakaon sa mosurender

Nagpasiugda og protest rally didto sa Makati City, atubangan sa Chinese Embassy, ang mga pangulo sa nagkalain-lain’g mga youth organization pinangulohan sa Alyansa Bantay Kapayapaan at Demokrasya (ABKD), diin kusganon nila’ng gisaway ang agresibong lihok sa Chinese Coast Guard sa Ayungin Shoal.  Bisan sa mga pang-bully sa China kanato, dili pa angayan nga makig-gubat kita sa China tungod sa tataw nga mga rason.  Labot pa, matud pa sa mitaliwan nga si Senador Miriam Defensor, “Lisod kon atong gubaton ang China kay kon modaug kita, unsa ma’y ipakaon nato sa kadaghan unya nga mga Intsik nga mosurender?”.  Madahaan!

Dili buotan ang intsik?

Matud pa ni Senador “Bato” Dela Rosa, walay katungod ang China sa pagdiktar sa mga Pilipino sa pag-kwestiyon niini kabahin sa pagdagsang sa mga estudyante’ng Intsik didto sa Cagayan Province. Dugang pa sa senador, normal ang reaksyon sa mga Pinoy kay dili man usab buotan ang mga Intsik.  Makapahimuot apan may diyotay’ng kamatuoran ang paghulagway ni Senador Dela Rosa sa mga Intsik nga “dili buotan”.  Angay nga imbestigahon ang panghitabo sa Cagayan kay ginaingon man nga, “Adunay mga tawo nga dunggabon ka sa likod unya magpatuso-tuso dayon og pangutana ngano nga nagkadugo ka”.  Fezteleern!

Gi-apply ang agree-culture

Gipanghimakak ni First Lady Marie Louise Araneta-Marcos ang mga pasangil nga “under de saya” ang iyang bana nga si Presidente Marcos ingon man ang mga spekulasyon nga gi-kontrolar niya ang mga desisyon sa Presidente.  Matud pa sa akong amigo, “Mao diay nga ang Presidente gayod ang milingkod isip una’ng kalihim sa Deparment of Agriculture (DA).  Didto sa DA, gi-apply sa Presidente ang “agree-culture”, kultura ug kinaiya sa dili pagsupak sa asawa, mao nga nakab-ot sa Presidente ang taas nga GDP kon Gross Domestic Peace. Mao kana’y giingon nga “Unsaon nga Bana ra man lage ‘ta!”.  Muleeng!

Langit ra’y nasayod

Giawhag ni Senador Risa Hontiveros ang PNP nga panghingusgan na ang pagpangita sa fugitive nga si Pastor Apollo Quiboloy, kinsa aduna na’y tulo ka arrest warrant nga gipangluwatan sa korte.  Sama ra’g nagpaghot sa buwan si Senador Hontiveros ni’ng iyang awhag.  Daghan na kita’g kasinatian sa nangagi nga basta mga dagko’ng personahe sa katilingban ang dakponon, daw sama sa bao kahinay ang lihok ug sama sa wati nga walay utok ang atong mananakop.  Kon unsa ang hinungdan, “langit ra’y nasayod”.  May’pag moligeed!

Katoliko ‘sab diay

Naalarma na ang mga senador tungod sa mga taho nga ang mga diploma ug mga degree sa kolehiyo gipamaligya na ngadto sa mga estudyante’ng Intsik, bugti sa pagbayad og P2million.  Dili ikahibulong kay karon’g panahona, bisan unsa mahimong bayran tungod lang sa kalisod, panginahanglan ug sa kagustohan sa tawo nga magpasayon.  Makapahinumdum sa estorya/komedya bahin sa pari nga nagdumili unta pagbunyag sa iro kay hayop man lage. Apan sa dihang giingnan nga aduna’y ipahatag nga 10 mil isip bayad sa bunyag, dali’ng naka-ingon ang pari nga, “Aaw, wa man ka magsulti dayon nga katoliko sad diay imong iro”. Pagkatoytoy!