Naguol ko uy

Sabado na gyud karon. Ayaw mo kalimot nga pagpundo daan mo og tubig kay ang major supplier og tubig sa MCWD, ang JE Hydro Bio-Energy Corporation, maghimo og tulo ka adlaw nga maintenance check-up sa ilang mga makinarya ug kagamitan.

Sugod ugma, alas utso sa buntag Domingo, pagngon sa JE Hydro ang ilang mga bomba, ug nagpasabot nga mohinay ang pag-agas sa tubig sa mga linya sa MCWD diri sa mga barangay sa Cebu City north district.

Ako gani, pagka karon pa lang daan, puno na ang akong mga sudlanan nga bali’g 10 ka baril. Timan-i nga Martes pa sa hapon mopaandar pagbalik ang JE Hydro sa ilang mga makina, gawas kon mahuman ra og dali ang maintenance check-up.

* * *

Naguol bitaw ko kay samtang nag-atubang kita og dakong problema sa kanihit sa tubig dinhi sa Cebu City, nag-atubang usab og kaguliyang ang ilang mga opisyal.

Naa pa’y ubang mga tawo nga pwerte makahimo pagsaway tungod kay hinay ang agas sa ilang mga gripo nga unta kining problema sa kanihit sa tubig, nagumikan man kini kay mihubas man ang tinubdan.

Tiaw mo nga nahubsan ang Jaclupan Dam sa Talisay, ug Buhisan Dam sa Barangay Buhisan, Cebu City, nga maoy gisaligan sa tubig nga gigamit sa mga konsumidor sa kabarangayan sa south district.

Maayo gani kay diri sa north district, anaa ang JE Hydro, apan mikunhod usab ang supply kay mikunhod na usab ang tubig gikan sa tinubdan sa Barangay Lusaran.

Kon may agas, pagsawod gyud mo.

* * *

Angay na gyud diay ta karon nga magbantay kay misul-ong na usab ang mga tawo nga manghilo. Amigo nako nga suking tigpaminaw sa akong programa sa radyo, nabiktima kay gihiloan.

Luya kaayo ang lawas ni Roger Cabalhug ug way umoy ang iyang mga lotahan, mao nga napugos siya pag-undang usa sa pagtrabaho.

Gani, miniwang tawon si Roger, ug nausab og gamay ang iyang tingog nga hapit na ko dili makaila dihang ako siyang gitawag sa cellphone.

Gidala si Roger sa ospital, apan gitug-anan siya sa doktor nga wa man siya’y sakit. Dunay nakasulti kaniya nga basta ingon niana ang bation sa tawo nga mokalit lang og kaniwang ug magluya, gihiloan na.

Kini gud si Roger, hilig kaayo nga mokaon sa mga carenderia nga anaa sa Cordova nga sagad dagsaan sa mga tawo nga mokaon og bakasi, nagtoo siya nga didto siya nahiloan.

Mao nga pagbantay gyud mo kay misalga na sab diay ang mga hiloan. Usa nako ka kumpare nga taga Lorega-San Miguel, susama kang Roger og gihambin kaniadto, miniwang sab ug maluyahon.

Nahibaw-an niya nga gihiloan sab diay siya, ug karon hinoon maayo na kay nagpatambal og meriko, kun quack doctor.