Nagpalaban kay gidukol

Sumala ni Herman Tiu Laure, presidente sa Manila-based think tank nga Asian Century Philippines Strategic Studies Institute, ang panag-kumboya sa  Pilipinas, US ug Japan nakatandog sa malinaw nga paglawig ug naka-baliko sa kahimtang sa seguridad sa giilogan nga West Philippine Sea (WPS) labi na kay giisip sa China nga kaaway ang Japan sukad pa kaniadto’ng ikaduhang gubat sa kalibotan.  Mahimo’ng balido ang panglantaw ni Laurel apan dili usab ikalimod ang benepisyo kabahin sa pagprotehir sa soberiniya nga naani sa Pilipinas gumikan sa maong panagkumboya.  Matud pa bitaw sa akong amigo, “Ikaw kuno’y sigehan og dukol sa ulo sa bugoy diha sa may kanto, dili diay ka magpalaban sa imong igsoon ug mga amigo?”  Saoonz!

Makapalapad sa kaugmaon

Namahayag si President Marcos, Jr., nga dili niya katungdanan ang pagpangayo’g pasaylo ngadto sa mga biktima sa martial law ug nga mas mahinungdanon ang iyang obligasyon isip Presidente kay sa iyang papel isip miyembro sa pamilya’ng Marcos.  Daghan ang nagtoo nga dili makataronganon ang pagpahid sa hingpit ngadto sa anak sa mga “sala” sa amahan.  Gituohan pa gani nga ang pagpili ni Bongbong Marcos isip presidente nagmatood nga gipasaylo ug gihikalimtan na sa kadaghanan ang “kasal-anan” sa maong banay.  May punto ang panultihon nga, “Ang pagpasaylo mahimo’ng dili makapa-usab sa nangagi, apan makapalapad kini sa kaugmaon.”  Muleeng!

Pagdawat sa kapildihan

Gitun-an sa COMELEC kon maayo ba nga tangtangon na lang ang barangay certification isip rekisito sa pagparehistro sa usa ka botante. Kini tungod kay adunay nasinati ang COMELEC nga insidente diin ang nagparehistro wala pa makadangat sa edad alang sa pagboto. Kon ang pagtangtang sa barangay certification makapadasig pag-exercise sa katungod sa pagboto, angayan kini nga buhaton. Sa demokratikanhon’g katilingban, dili malalis ang kamahinungdanon sa pagbotar.  Kay ginaingon man nga, “Ang dili pagbotar, dili matawag nga protesta kon dili pagdawat sa kapildihan.”  Fezteleern!

Migawas kay alimuot

Upat ka adlaw human siya matudlo sa LWUA isip OIC-General Manager sa MCWD, miluwat gilayon sa iyang katungdanan sa Atty. John Dx Lapid kay alang kaniya dili kini makabugti sa kahasol nga iyang nasinati.  Alang kang Atty. Lapid naipit lamang siya sa politika ug gigamit lang siya sa nagkabangi nga mga habig.  Sayon sabton ang gibuhat nga pagdemiter sa katungdanan ni Atty. Lapid.  Makaluya tinuod ang maong kahimtang.  Gisubay lang sa abogado ang panultihon nga, “Kon dili ka kaagwanta sa kainit, gawas na dayon sa kusina”.  Madahaan!

Dili madala’g ‘oido’

Human sa makaani og mga pagsaway ang gi-implementar nga simulation sa gi-proponer nga roundabout system sa usa ka intersection sa Mandaue City, gipahunong kini sa mga opisyal sa maong dakbayan ingon man sa gobernadora.  Kanus-a pa ba makaamgo ang atong mga lider nga ang isyu kabahin sa trapiko dili madala’g oido ug nagkinahanglan kini’g teknikal nga kahibalo ug tiunay nga pagtoon sa mga experto.  Makapahinumdum sa unggoy nga nagtoo nga malumos ang isda kay milangoy kini sugat sa sulog.  Sa iyang kalooy sa isda, gihaw-as kini sa unggoy gikan sa tubig. Hasta’ng pataya hinoon.  Pagkatoytoy!