Napakyas sa pagbayad sa ilang loan sa bangko

Dear Atty. Divine,

Mangutana unta mi kun unsay angayang buhaton bahin ining yuta sa among mga ginikanan nga ilang gi loan sa bangko. Wa mi masayud nga gi-loan diay sa among parents ang maong property ug nahibaw-an lang kini namo karon sa dihang nakadawat mi og notice gikan sa bangko nga embarguhunon na ang maong property kay wa kabayri nila ni mama ug papa ang ilang loan nga diin ang maong yuta ang ilang gihimong collateral. Namatay na ang among mga ginikanan ug gusto unta namo nga lukaton ang maong property apan dako na man og bayranan tungod sa interest. Unsay angayan namo nga buhaton? Daghang salamat.

Ernesto

* * *

Dear Ernesto,

Kinahanglan nga inyong adtuon ang bangko ug inyong sultian labot sa inyong tinguha sa pagbayad sa loan aron dili ma-embargo ang yuta sa inyong mga ginikanan. Inyong ipa-compute ang total ninyong bayranan ug suwayan ninyo sa panghangyo ang interest niini kun mahimo ba nga pakubsan. Kun dili gyud madala og hangyo, kinahanglan gyud ninyo nga bayran ang maong utang aron dili ma foreclose ang yuta nga gihimong collateral. Kun pananglit ma-embargo gyud sa bangko ang property, aduna moy usa ka tuig nga redemption period, ug mao na kini last chance ninyo sa pagbayad sa utang or else hingpit na gyud nga makuha sa bangko o sa bag-ong buyer niini ang inyong yuta. Thank you and God Bless. -- Atty. Divine

* * *

Alang sa inyong pangutana, palihug lang sa pag-email sa [email protected] og akong tubagon ang inyong pangutana pinaagi sa akong column matag Miyerkules, Sabado ug Domingo