EDITORYAL — Mga drayber nga paturagas

Dunay daghang mga balita ug mga viral videos sa social media nga nagpakita sa panag-away ug misangpot pa gani sa mga sinumbagay ug pagpamusil sa parehong mga motorista diha sa kadalanan.

Matud pa sa uban, dala ug epekto kini sa kainit karon sa panahon. Apan bisan gani wala pay El Niño duna nay daghang mga insidente nga sama niini diha sa kadalanan.

Apan ang tinuod niini, daghang mga drayber, pribado man o mga pasaheroan ang mga abusado ug kuwang gyud og road courtesy.

Usa niini kaning mga pataka ra og suot, dunay mokalit og sira sa agianan, kusog ug peligrosong pag overtake, ug kaning paturagas og busina kay gustong makauna bisan og silay naa sa luyo. Wala sila makaila og “Give Way” o “Yield.”

Ang uban niining mga hitaboa dili baya tinuyo, apan tungod nabatasan naman gud aning mga drayber nga kuwang sa road courtesy, mura og ilang paminaw kun makagunit na og manobela sila ray naggamit sa dalan.

Duna say uban nga tuyoon gyud nga mokalit lang og gawas gikan og eskina kay dili sa saktong direksyon sila magtan-aw.

Kana bitaw’ng mga sakyanan (kasagaran mga pasaheroan ug dagkong trak de karga) nga padung mosulod og highways gikan og eskina unya moliko sa tuo, inay nga motan-aw sa wala diin magagikan ang mga sakyanang nagsubay ng daan sa highway, tuyuon gyud nila nga didto lang motan-aw sa tuo.

Ang unang tan-awon sa drayber kun intensiyon nilang moliko didto gyud sa ilang padulngan ug di kini moliko didto kun dunay laing sakyanang maigo.

Sa defensive driving, human og tan-aw sa direksyon nga likoan, sunod gyud tan-awon ang pikas lane apan di nila kini buhaton aron mapugos og hunong ang nagsubay sa dalan nga diin sila mosulod.

Mao kini ang hinungdan nga mabanggaan sa mga sakyanang nakabwelo nang daan, makurat nalang ang uban sa ilang pagbutho gikan sa eskina. Kun maka brake man, siguro gyud nga moulbo sa kasuko ang gikan sa pikas lane.

Daghan gyud sa mga drayber karon ang gawas nga walay road courtesy, reckless kaayo sila ug dili magpakabana sa kaluwasan sa uban ug sa ilang kaugalingon.