Bakakon?

Nabalaka ang mga nagpuyo sa Barangay Tejero sa dakbayan sa Sugbo ilabi na ang mga nagpuyo haduol sa Tejero Creek tungod sa ilang nakita nga color gatas nga tubig nga nagdagayday sa sapa sa Tejero niadtong adlaw nga Sabado, Abril 6, 2024.

Maoy gituohan sa mga taga Tejero nga gikan sa kemikals nga gilabay sa sapa ang nakita nilang color gatas nga tuig nga nagdagayday sa sapa nga nagdagan sa luyo nga bahin sa daan nga White Gold House padulong sa Tejero Barangay Hall nga nahimutang sa may dalan Alviola ug T. Padilla. Sa usa ka interview, si Grace Luardo, pangulo sa Ceset, miangkon nga wala sila masayod sa tubig nga color gatas nga midagayday sa sapa sa Tejero hangtod nga gipahibawo sila sa tigbalita sa laing pamantalaan. Kini ang hinungdan nga nagpadala dayon siya og tawo nga mosusi sa balita nga iyang nasayran.

Human sa gihimong pakisusi sa mga tawo sa Ceset ilang nasayuran nga ang color gatas nga tubig nga midagayday sa sapa nagagikan sa dili maayo nga sistema sa kanal sa Mactan Rock Industries Inc. nga usa sa mga supplier og tubig sa Metro Cebu Water District.

Tungod niini, gitug-an ni Luardo nga iya dayon nga gipagawsan og citation ticket ang nahisgotang kompanya tungod sa paglapas niini sa Ordinansa 2398 sa siyudad nga may labot sa kakuwangan sa septic tank ug sakto nga kanal. Tungod niini, ang Mactan Rock Industries Inc. makabayad og duha ka libo ka pesos sulod sa pito ka adlaw human gipagawas ang citation tickets.

Apan gipanghimakak sa usa sa mga opisyal sa kompanya ang pasangil batok sa ilang kompanya. Giingon ni Antonio Tompar nga dili gikan sa ilang kompanya ang color gatas nga tubig nga midagayday sa sapa sa Tejero nga gituohang kemikals. Sayon lang ni Tompar ang pagpanghimakak apan lisod ang pagpamatuod niini. Duda ko sa pamakak sa opisyal sa Mactan Rock. Hinuon mituo ko sa resulta sa pakisusi nga gihimo sa mga tawo sa Ceset.

Sa miaging lunes may gikuha nga samples sa tubig sa sapa ang DENR-EMB7, CCENRO, Task Force Gubat sa Baha ug Coastal Management Board alang sa testing sa tubig.

Agi og panagana, mas maayong ipahunong lamang una ang operasyon sa kompanya samtang wala pa ang resulta sa testing sa tubig aron makasegro ang katawhan nga dili makatag ug modaghan pagmaayo ang color gatas nga tubig nga posibleng kemikals nga gikan sa Mactan Rock Industries Inc.