Kinsay mabasol?

Usa ka hulagway nagpakita nga ang dakong kanal, (dili gyud maisip nga sapa) nga anaa kilid sa Pasil Fish Port ug paingon kini sa dagat, napuno sa mga basura.

Akong klarohon nga ang maong tumoranan og mga isda, gihinganlan og Pasil Fish Port, apan anaa gyud kini mahimutang sa Barangay Suba.

Kaniadto gud, ang tibuok lugar gitawag ra og Pasil, apan taudtaud na nga katuigan nga gibahin kini sa duha ka barangay nga mao ang Pasil ug Suba.

Matud pa sa post sa social media nga ang mga lumolupyo sa Barangay Suba, nangreklamo na tungod sa grabeng kabaho sa lainlaing klase sa mga basura nga anaa sa dakong kanal.

Ang report nagkanayon nga giawhag sa mga lumolupyo ang kadagkoan sa City Hall nga limpyohan ang maong kanal kay hilabihan na kabaho.

Nakamugna kini og pagsaway sa mga netizens kay kon nagtuman pa sa balaod ang mga lumolupyo diha sa Barangay Suba ug wa manglabay g basura ngadto sa kanal, wa untay problema.

Nakaingon ko nga husto gyud ang komentaryo sa mga netizens. Diin man gikan ang mga basura? Unya, unsa may gihimo sa mga opisyal sa barangay?

Akong ipasabot nga ang barangay dunay kaugalingon nga mga garbage truck, ug sigun sa gikasabotan, nga ang mga garbage collector sa siyudad, mohakot sa mga basura nga anaa sa main roads.

Ang mga basura nga anaa sa interior roads nga sakop sa barangay, ang garbage truck sa barangay maoy mohakot.

Adunay katungdanan ang mga opisyal sa barangay nga badlongon nila ang ilang mga lumolupyo nga dili magpataka g labay sa basura.

Tinuod, dunay  Gubat sa Basura  nga gikampanya ang City Hall, apan mangutana ko, unsa man diay gihimo sa atong mga opisyal sa barangay?

Aron makat-on og pagpanglimpyo ang inyong mga lumolupyo, suwayi kuno ninyo nga ipatawag og miting ang maong mga lumolupyo ug patabanga sila sa pagpanglimpyo sa kanal.

Tingali, pinaagi niini, makat-on na sila og leksyon ug maglikay na sila sa pagpataka g labay sa mga sagbot ngadto sa kanal kay kon ila kining himoon, sila ra man gihapon ang manglimpyo.

Kon dili man mosanong ang mga lumolupyo, isugyot nako nga ipatuman ang balaod ngadto sa mga magpataka g labay sa mga basura.

Ayaw kahadlok sa pagpamulta kanila, ug kon dili mobayad og multa, ikiha. Para nako, ingon niana ang tukma nga opisyal sa barangay, dili kay mahadlok nga mopatuman sa balaod, aron lang gyud nga humot sila sa mga botante ug makadaog sa sunod eleksiyon.