Dear Atty. Divine,
Ang akong mama nakakita og away tungod sa punoan sa manga. Mireklamo man gud ang akong inahan kay ang sanga sa manga nga gipanag-iya sa tupad sa among balay anaa na magbad-ay sa among atop ug tungod niini ang mga laya nga dahon anaa magtapok sa among atop ug mao kini hinungdan nga malata ang among sin. Gisulti-an na ni mama ang among silingan nga ipaputol ang maong sanga apan wa gyud gihapon niini buhata kay matud pa aduna pay daghang bunga. Ang akong pangutana kun mamahimo ba nga kami nalang ang mopaputol niini? Mamahimo ba sab nga among kuhaon ang bunga sa manga nga anaa mapunta sa among atop? Daghang salamat. -- Loida
* * *
Dear Loida,
Basi sa Article 680 sa atong Civil Code, kini nagkanayon nga kun ang sanga sa kahoy molapas ngadto sa silingan, ang tag-iya niini mamahimo nga mo demand sa tag-iya sa kahoy nga ipaputol ang sanga niini nga milapas ngadto sa ilang property. Kun dili kini buhaton sa tag-iya mamahimo kini ninyong ireklamo sa barangay. Samtang kalabot sab sa bunga sa prutas sama sa manga nga milapas sab ngadto sa inyong property, wa kamoy katungod nga mo harvest niini kay basi sa Article 681 sa atong Civil Code, kadtong prutas nga matagak naturally sa kasikbit nga yuta mao ray mamahimong kuhaon, busa kadtong manga nga nagbitay pa sa sanga niini bisan kun anaa kini sa inyong atop, gipanag-iya gihapon kini sa inyong silingan og wa kamoy katungod nga mopupo niini. Kadtong mga tagak nga manga mao ra to ang mamahimo ninyong kuhaon. Thank you and God Bless. -- Atty. Divine
Alang sa inyong pangutana, palihug lang sa pag-email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.