Archival andam mag-mayor; Rama bukas nga makig-uban ni Osmeña

CEBU, Philippines — Si Konsehal Nestor Archival sa Dakbayan sa Sugbo nipadayag nga andam kini nga modagan pagka-mayor sa siyudad uban ni kanhi mayor Tomas Osmeña nga mao ang iyang bise mayor sa umaabot nga eleksiyon sa 2025.

Ang kampo ni Archival ug Osmeña giingong aduna na kini initial nga line-up alang sa eleksiyon sa sunod tuig diin sa south district congressman si Rodrigo ‘Bebot” Abellanosa samtang sa north district congress si Mary Ann Delos Santos.

Sa mga konsehal sa south district ang anaa sa linya nila mao si Jose Abellanosa, Margot Osmeña ug Jun Gabuya samtang sa north district mao sila si Alvin Dizon, Bebs Andales ug Alvin Arcilla.

Ang mga gihinganlan nga mga pangalan sa konsehal anaa na kini sa 90 porsyento nga magpapili pagbalik sa umaabot eleksiyon sa sunod tuig.

Si Archival nibutyag nga usa sa iyang mga plata porma pagka-mayor kinahanglan ang mga trabahante nga kahibalo na daan ug tukma nga modumala sa finances sa siyudad diin ang budget sa siyudad realistic diin ang mosulod sa panudlanan mao usab kini ang ipagawas nga gastohan.

Sa laing bahin, bukas sa posibilidad si Mayor Michael Rama sa Siyudad sa Sugbo kong mag-uban sila ni kanhi mayor Tomas Osmeña sa sunod tuig nga piniliay.

Kini maoy gibutyag ni Rama atol sa pakighinabi kaniya sa programa nga Super Hirit sa DYSS Super Radyo GMA kagahapon.

Si Rama nipadayag nga angay lang si Osmeña nga motingog kalabot sa isyu sa Cebu Bus Rapid Transit (CBRT) tungod kay anaa man siya’y papel sa katumanan sa proyekto.

Nipadayag ni Rama nga nalipay siya sa baroganan niini nga supak usab siya sa pagpahunong sa proyekto nga mao ang tinguha ni Gobernador Gwendolyn Garcia alang sa pagpreserbar sa edipisyo sa Kapitolyo.

Gumikan niini, nihimumdom si Rama sa panahon nga bise mayor siya kaniadto ni Osmeña. BDB BANAT NEWS