Insakto kaayo kining reklamo sa mayoridad sa mga Sugboanon nganong karon pa man kuno nangusog kining pipila ka gamhanang puwersa pagpahunong sa trabaho sa Cebu Bus Rapid Transit atbang sa Kapitolyo probinsiyal.
Hagbay ra nga gisugdan ang maong proyekto. Gani dako na nga trabaho ang nahimo pagmugna sa CBRT bus lane ug station diha sa Osmeña Boulevard, gikan sa Kapitolyo ngadto sa Fuente Osmeña rotunda.
Apan nganong karon ra man mitumaw kining mga pagbabag batok sa CBRT nga nakaarangkada na man kini? Nganong karon ra man mitumaw kining mga reklamo nga nakababag kuno kini sa view sa Kapitolyo nga usa ka heritage site?
Ah, your guess is as good as mine. Politika. Klaro kaayo mga misulpot sa eksena ang politika aron pagdeskaril sa CBRT project. Ug klaro nga dako kini og epekto sa dagan sa konstruksiyon sa maong proyekto.
Ambot pa nganong inyo pa mang sagolan og pamolitika ang maong proyekto. Angay unta hinumdoman ning atong mga opisyal nga mismo ang mga Sugboanon ra gihapon ang makapahimulos sa maong proyekto.
Ako hagbay rang walay bilib sa saad sa mga proponent sa CBRT nga dako kini’g tabang sa pagpauswag sa sistema sa mass transport sa Sugbo. Kini tungod lagi sa ka hagip-ot na sa atong mga karsada ug sa ka daghan na sa mga private vehicles.
Apan gumikan lagi kay nasugdan na kining maong proyekto, ato na lamang kining tiwason aron usab kapahimuslan. Hilabihan na ka dako sa resources ug panahon ang nagasto sa kagamhanan ug sa mga foreign donors alang sa katumanan niini.
So, angay lamang usab unta nga hunahunaon sa pipila nga gustong mopahunong sa CBRT nga kinahanglan ang interest sa katawhan ang mopatigbabaw. Ug puwede ra gyud nga mapangitaan og kasulbaran ang ilang mga reklamo.