EDITORYAL - Andam na ba ang DepEd sa El Niño?

Hinayhinay nang nabatyagan sa pipila ka dapit sa Pilipinas ang epekto sa El Niño o gitawag sab nga “huwaw,” gani aduna nay mga probinsiyang nagsalig sa agrikultura ang nangaughan og tubig ning mga higayona.

Apan dili lang ang agrikultura ang apektado niini. Ang mga tinun-an nga padayung nagtungha karon sa nagkadaiyang eskuylahan sa nasud.

Sa miaging tuig, daghan ang nangreklamo tungod sa matud pa grabeng kainit sa panahon ug apektado na ang mga kabataang nagtungha sa mga eskuylahan tungod sa kainit.

Daghan sa mga bata ug bisan mga magtutudlo ang na-absent tungod kay nangasakit tungod sa kainit sa panahon.

Gani kung buot hunahunaon, sa miaging tuig ning susamang mga buwan wala pay El Niño kay nisulod kini sa Pilipinas  tungatungang bahin tuig 2023.

Kun grabe ang kainit sa temperatura sa miaging tuig, unsa nalang kaha karong tuiga  nga dunay El Niño?

Nakapangandam na ba kaha ang mga eskuylahan kun unsaon pagsigurong makapokus ang mga estudyante sa pagtuon?

Dili man tingali kaya sa bulsa ang pagbutang og aircondition units sa tanang lawak saringan sa public schools, electric fans tingali pwede pa apan kinahanglan nga ubay-ubay gyud ang ibutang.

Ang labing maayo gyud unta mao kining modular class o online class apan nakita man sa dihang gipatuman kini panahon sa pandemiya sa Covid-19 sugod 2020 hangtud 2022, napasagdan gyud ang kalidad sa pagtuon sa mga bata.

Kun buhaton kini karon tungod sa huwaw, kinahanglan siguraduhon nga aduna gyuy makat-onan ang mga bata ug maayo ang ilang modules ug monitoron gyud og maayo sa mga magtutudlo.

Dili sab mahimong tibuok semana kini buhaton kay mapul-an gyud ang mga bata. Kun mahimo, banus-banos lang. Ang long term solution niini, kaning desisyon sa DepEd nga ibalik sa karaang school calendar ang klase sa mga bata nga magsugod sa buwan sa Hunyo aron matapos sa Marso nga mao sab ang buwan pagsugod sa tinginit sa nasud sa ordinaryong mga panahon.