Buotan nga Sugbo anong higante
Ambot tungod ba kaha sa daghang istorya nga akong nadunggan parte niya, o tungod sa kanunay nakong pagsunod sa mga balita sa iyang ka-dominante sa Philippine Basketball Association (PBA), akong gisangpit si June Mar Fajardo pagsud niya sa restaurant sa Banilad, Cebu City nga among gikan-an.
Gitagad ko niya. Bisan klarong wa siyang kaila. Nipadung siya sa pikas nga lamesa dihang ang akong asawa, nga nagtuo sab nga kaila mi, nitawag sa iyang ngan ug niawhag niya pagduol aron makapa-letrato mi uban niya.
* * *
Imbes masuko sa among kasamokan, mapahiyumon siyang nisugot. Pero klarong wa siyay ideya kinsa ang mga tiguwang nga naghasol niya. Maong ako siyang giingnan nga giistoryahan ko ni Atty. Baldomero Estenzo sa una nilang panagkita. Ningisi siya. Kay si Estenzo ang sinugdanan sa iyang basketball career.
Nag-tsinelas si June Mar nga nisud sa opisina ni Estenzo sa University of Cebu (UC) nga nangutana duna bay scholarship. Salamat sa rekomendasyon ni Estenzo nga nakakita sa dakong kapuslanan sa lunsay niyang interes ug talagsaon niyang kataas, labaw pa sa scholarship ang gitanyag sa UC niya.
* * *
Sapatos nga mosakar sa higanteng mga tiil ni June Mar ang unang problema ni Estenzo. Nga nasulbad dayon dihang nagpadala sa saktong mga sapatos ang alumni sa UC nga tua na sa Estados Unidos nga iyang gidangpan.
Si Junrey Nadela sa ABS-CBN, nga ilang silingan sa Pinamungajan, maoy niseguro nga makakita sa live coverage sa unang duwa ni June Mar sa PBA ang iyang inahan nga si Marites. Nga nireklamo dayon ni Junrey sa una pa lang pagkupot ni June Mar sa bola, “Nganong gikulata man nila nang akong anak!”
* * *
Sa mga nakakita sa unang basketball game ni June Mar sa UC sa 2007, o 17 ka tuig nang nilabay, way nagdahom nga mo-dominar siya sa PBA: Duna nay pito ka MVP awards. Bisan sa seryusong injury sa niaging tuig, dako ang kahigayonan nga makasakmit sa iyang ika-walo karong tuiga. Layo og biya silang Ramon Fernandez ug Alvin Patrimonio nga dunay tag-upat ka MVPs.
Bisan way makaambas sa gidaghanon sa kampeyonato nga iyang natumpi, wa pa siya mahuman. Ug maayo pa gyong managad sa wa niya mailhing senior citizens.
* * *
- Latest
