Sayop nga pagtuo
Sunudsunod ang mga pasangil sa anomaliya sa mga ahensiya sa administrasyon ni Presidente Ferdinand Marcos Jr. sa niaging mga adlaw:
Ikaduhang taas nga opisyal sa National Food Authority (NFA) nipasangil nga ilang administrador mao ang nangu sa mafia sa ahensiya;
Niangkon ang Department of Education (DepEd) nga dunay mga opisyal nga nanguwarta sa bag-o nilang programa, ang Catch Up Fridays; ug
Nikumpisal ang Bureau of Customs (BOC) ug Land Transportation Office (LTO) nga nalutsan sila sa smuggling sa duha ka Bugatti Chiron nga mahimong nakapa-alkanse sa gobyerno og P366 milyones.
* * *
Mga nalista sa ibabaw nasumpay sa nahaunang gidudahan nga mga transaksiyon sa administrasyon:
Dakong opisyal sa Malakanyang nga gipasanginlang nangayo og minilyon ka pesos nga bugti sa pagkatudlo sa importanteng mga puwesto sa gobyerno igo lang gitaktak pero wa ikiha ni siloti;
Higala sa paryente sa asawa sa presidente nga gipasanginlang utok sa agricultural smuggling wa idayon og patawag sa imbestigasyon sa House of Representatives; ug
Kinadak-ang importasyon sa bugas humay sa niaging tuig wa ipaubos og subasta kay ang Malakanyang ray nagpili sa mga negosyanteng nakaapil sa transaksiyon.
* * *
Tsamba ba lang nga sa unang usa ug tunga ka tuig sa administrasyong Marcos nitiyabaw ang publiko, apil nang mga negosyante, sa pagsamot sa pangurakot? Nga nagkinahanglan na og padangog ang hapit tanang ang-ang sa ilang mga transaksiyon? Nga nangilkil na og bayad ang hapit tanang nipirma ilang mga dokumento?
Dako ang kalainan sa aktuwal nga panghitabo sa abundang pasalig sa administrasyon nga gihimong mas sayon ang pag-negosyo ug nga tabangan ang tanang gustong mobubo og puhonan nga momugna og dugang kahigayonan sa trabaho.
* * *
Tungod sa kamaayong mo-iningles ug kakalmang manulti, usahay makalimtan nga ang presidente konbiktadong tax evader, nagdumili pag-angkon ug pag-uli sa ilegal nilang katigayonan ug nagpaugat pag-isnab sa ilang P203.8 bilyones nga utang sa estate tax. Tungod sa sigeng ulug-ulog sa masa, usahay mataligam-an nga ang bise presidente anak sa gipasanginlang utok sa extrajudicial killings samtang nagduma sa Davao ug Malakanyang.
Wa magkuwang ang atong katiguwangan pagpahinumdom pero sa makadaghang higayon maglaom lang gihapon ta, daghang salamat sa gipabaha nga fake news, nga ang serepente manganak og pati.
* * *
- Latest
