Kinsa ang sad-an

Wala na motungha sa tunghaan ang 14-anyos nga tinun-an nga nag viral sa social media human gipublikar sa iyang ginikanan ang gihimo sa magtutudlo nagdto kaniya diin gipiktan siya niini. Giingon nga naulaw ang tinunan sa nahitabo kaniya hinungdan nga wala na kini motungha sa tunghaan.

Si Dr. Salustiano Jinemez, ang Director sa Department of Education (DepEd 7) dinhi sa Rehiyon 7, mimando na sa iyang superintendent kaniadtong Martes, Pebrero 27, sa pagpahigayon og imbestigasyon nga magsubay sa sakto nga proseso. Gitug-an ni Director Jimenez nga ang pag-assault sa magtutudlo ngadto sa 14 anyos niyang tinunan nahitabo niadtong Pebrero 16 ning tuiga.

Giklaro ni Director Jimenez nga ang Dep-Ed-7 mipahigayon og imbestigasyon aron masuta ang kasaypanan sa magtutudlo bisan pa man og wala mopasaka og pormal nga reklamo ang ginikanan sa tinun-an.

Gitugan ni Director Jimenez nga ang magtutudlo nakahimo sa pagdagmal sa tinun-an tungod sa iyang kahingawa ug kabalaka nga madisgrasya kay mibiya kini sa iyang klase (cut his class) kay naligo sa dagat sa South Road Properties (SRP). Apan giangkon ni Director Jimenez nga dapat gikontrol unta sa magtutudlo ang iyang imosyon tungod kay dunay balaud nga nag-regulate sa Departamento sa Edukasyon.

Hinuon nagpahinumdom si Director Jimenez nga ang mga magtutudlo tawo lamang nga makahimo og sayop ug adunay pagbati.  Tungod sa desire nga makaton ang bata makahimo siya o mapitik niya ang bata kay mao lagi tawo rapod and naa gyud tay feelings.

Kun wala man motungha sa tunghaan ang 14 anyos nga tinun-an tungod kay naulaw sa nahitabo kaniya, karon, kinsa man ang nagpakaulaw kaniya? Ang magtutudlo ba nga midagmal kaniya, ang iyang ginikanan nga mipublikar sa social media sa gihimo sa magtutudlo kaniya o ang mikuha og video sa nahitabo kaniya?

Kun ikaw ang pangutan-on, kinsa ang sad-an sa wala na pagsulod sa tinun-an sa tunghaan tungod kay naulaw human napublikar sa social media ang nahitabo kaniya? Ang imong tubag, pareha rapod sa akong tubag.