Katarong kaabin ni Robin

Makapasubo ang kahimtang sa Pilipinas karon. Ang Bongbong Marcos-Sara Duterte tandem nga maoy gipadaog sa kinabag-ang botante kay gituohang maoy kinalig-onang paris nga mopadayon sa unsay mga kaayohan nga nasugdan na ni kanhi Presidente Rodrigo Roa Duterte (PRRD), halos tanan, pulos grabing kadismaya ang naani.

Sanglit paglingkod pa lang sa Malakanyang sa mipuling Presidente Bongbong Marcos (PBBM) namatikdan gilayon sa mga alertong nagmabinantayon, nga may sungayang anino, kinsa sa hilom gustong moguba sa hingpit sa maong lig-ong tandem.

Kay sukad pa sa sinugdanan, wala kini makaayon sa mga Duterte ug gustong mahanaw ang Dutertes sa politikanhong dalan.

Sa gipakitang taras sa mga kongresista ug senadores, kinsa sobra kahawod ug ka-bias moimbestiga, nahimong desparado ang katawhan. Busa, ang kinabag-an wala na mosalig kanila. 

Hinuon, may usang nalahi – si Senador Robinhood ‘Robin’ C. Padilla.

Ubos ra tuod iyang educational attainment kon ikompararar sa kaubanang Senadores, kinsa sagad mga abogado, masteral-doctoral graduates.

Pero wala silay espirituhanong hiyas sama sa nahuptan ni Robin – ang kalig-og baroganan ug ang kaantigo morespeto sa tinuorayng balor sa utang kabubut-on.

Lalim bay, ning higayon nga giduot-gihugawhugawan pag-ayo ang reputasiyon ni Kingdom of Jesus Christ Pastor Apollo C. Quiboloy gamit ang nagmaskarang witnesses, kinsa nanagdalag kodigo atubangan sa Senado, si Robin maisogong mihatag og katin-awan, nga si Quiboloy, bisan singko sentabos, wala gyod mahitabong nangayo niya.

Mas siya pay gihatagag pabor sa pastor. Kay dihang miduol siya aron mangayog tabang niadtong 2022 election, gipagamit ug gi-promote iyang kandidatura sa SMNI nga libre. Ug bisan na-Senador na si Robin, wala gyod mangayog bawos ang pastor kaniya.

Dinhi malugtab akong dughan sa giyagyag ni Robin. Kay samtang halos tanang politkong gipangtabangan ni Quiboloy sa 2022 election pulos mitalikod ning makalilisang pagpamunoan ni Marcos, diin by hook or by crook gusto gyong pus-on si Quiboloy hangtod mapusa, si Robin nagpabiling mibarog-dupa sa habig sa pastor ug mitug-an nga base sa iyang nasinating kinaiya ni Quiboloy, kini usa ka tarong, manggiluy-on ug manggihatagong tawo. Sukwahi, sa gipadagang scripted stories sa mga nagtakobang witnesses.

Busa, dili ikahibulong nganong mipakitag anino sa pagdayeg ang aktor-senador ngadto sa pastor. Sanglit, tanang tarong tawo ug katarong gakson-ampingan man ni Robin.