Kinabag-ang Pilipino dismayado

Dili ikalimod. Ning pagpamunoan ni Presidente Bongbong Marcos (PBBM), diin inay magkahiusa ang Kongreso ug Senado paghimog mga balaod aron makaginhawa bisan diyotay man lang ang katawhan, kinsa hagbay rang gilumsan sa grabeng korapsiyon sa atong gobiyerno, nagpunay na hinuog away ug daw nagkasabot pang gukdon-piiton ang mga Duterte.

Imbes buotang mobukhad atubangan sa publiko sa ilang tagsatagsa ka book of account sumala sa hugtanong kamandoan sa mga tarong magbubuhis nga nagsuweldo kanila, aron masubay kon limpyo ug husto ba ang paggamit sa tinuig nilang minilyon-binilyong confidential funds, nagpadingoldingol lang ang mga kongresista ug senadores.

Si PBBM mipasiatab nga iyang administrasiyon full of transparency. Unya, nganong dili man siya makapandayg executive order nga buksan ang tanan nilang book of account nga naghilambigit sa confidential funds lakip na ang iyaha? Kang VP Inday ra diay?

Pero in fairness, pirmeng open book baya ang opisina ni Inday ug ultimong Commission on Audit mimatuod nga nahisubay sa lehitimong pamaagi ug paggamit ang confidential funds sa atong bise presidenting gikahadlokan kaayo ni House Speaker Martin Romualdez.

Maong makita giunsa niya pagpahimulos ang nahuptan niyang gahom aron mahiktan sa ilang liog ang mga mangangalagad, kinsa kaugalingon ra nilang kaharuhay maoy gipalabi. Bahala nag maggubot atong nasod, mayatakyatakan ang hagbay rang nagkamang nga mga gagmay ug bahala nag impiyerno maoy mapuntariyahan sa ilang kalag.

Ning makaluluoy’ng kahimtang sa Pilipinas nga gikastigo sa naghinobrang pagpakaaron-ingnon, diversion, division ug deception, mga good governance vloggers mipahigayog kalye survey sa nagkalainlaing dapit: Luzon, Visayas ug Mindanao. Gikan Divisoria sa Manila ngadto sa kamerkadohan sa Mindanao – mga naninda ug mamalitay ilang gipangsukitsukit: “Kon ikaw maoy papilion, sa usa ka tuig kapin nga pagpamunoan ni PBBM ug sa usa ka tuig kapin nga pagpangulo ni PRRD, kinsa kanila ang the best ug daghang kaayohan nga nahimo?

Sagad sa ilang gipangduol-giinterbiyu, PRRD maoy gipili. Pirmeng nangiwit si PBBM. Dinhay usa ka kalye survey (Manila), diin nakakuha rag 2 si PBBM samtang si PRRD, 12. Sa Mindanao, kay gi-zero gyod si PBBM. Ngano?

Tungod kay silang tanan dismayado sa performance ni PBBM. Hasta ang diyotayng mipabor ni PBBM miamen. Nga dismayado pod sila. Warning signs na kaha kini?