Unta hit-and-run driver mosurender

Daghang Sugboanon masulob-ong misimpatiya sa hinanaling kamatayon ni kanhi Don Bosco varsity player Jeslar Uriel Larumbre human madumboli-hit and run og four-wheel nga sakyanan, kang kansang drayber mipaturatoy rag biya, bisan pa sa singgit-pakitabang sa nakasaksing tindera nga namaligyag prutas daplin sa karsada atbang sa may kilirang bahin sa Cebu Redemptorist Church pasado alas 6:00 sa buntag, Pebrero 4, 2024, adlaw'ng Domingo.

Naukay ang mainstream-social media. Iyaiya paghimog dugang imbestigasiyon ug walay hunong sa pag-follow-up hangtod natumbok nga ang tag-iya sa Mazda C7 with plate number YKK161, usa diay ka Karl Tan ug ang sakyanan anaa na sa kustodiya sa Guadalupe Police Station.

Ug narehistro sa pangalan sa iyaan ni Karl, kinsa wala moangkon nga siyay nagdrayeb niini sa maong adlaw sa pagkahitabo.

Apan dihang giinterbiyu usa sa ilang silingan sa media, kini mitug-an nga ilang nakita si Karl Tan nga maoy nanaog sa naasoyng sakyanan pag-abot sa giparkingan niini sa may alas 6:00 kapin sa buntag sa samang adlaw, Pebrero 4, 2024.

Ug gani, kanilang anaa ra sa duol nga tindahan, wala gyod si Karl managad. Kay daw nagdali kinig lakaw.

Usab, ang giinterbiyu miasoy. Hagbay rang adunay wangwang ug blinkers ang sakyanan ni Karl ug disturbo kuno kaayo kay magwangwang man kini inig abot sa ilang lugar.

Dili kay ang giinterbiyu ray nakakita ni Karl. Tanang diha sa tindahan nakasaksi pod.

Sa pagsulat niini, hugtanong gibarogan ni Karl nga dili siyay nagdrayeb sa kaugalingon niyang sakyanan.

May duplicate key kuno iyang business partner (babaye) ug basin kini maoy nagdrayeb sa maong adlaw sa pagkahitabo.

Ang pait, kay dili na kuno niya kini makontrak ug wala siyay address ikatug-an. Pastilan, no?

Ning panahon nga gamhanan kaayo ang social media, diin grabe makakutkot bisan unsa kalawom ang kutkotonon, makawtan gyod ang tinuod. Samot na, atong siyudad sa Sugbo nakahupot og premyadong opisyales sa kapolisan tungod sa ka-sharp shooter nilang mosulbad og mga kasong kriminal.

Busa, dili makalusot ang gustong moipsot.

Unta, hit and run driver nga midumbol-hunos sa kinabuhi ni Uriel, intawon surender na! Mas nindot, binukhad imong mga palad nga miduol-tunol sa imong hinabang. Kay sa binakliron ka aron posasan!