Pagbatok sa kamatuoran
10 ka buwan na human sa pagpuntirya sa China Coast Guard (CCG) vessel og military grade nga laser ngadto sa barko sa Philippine Coast Guard (PCG) sa West Philippine Sea (WPS) nga temporaryong nakabuta sa mga tripulante, wa pay tingog si Bise Presidente Sara Duterte Carpio.
Pila ka oras ra human gipagawas sa House of Representatives silang Eric Celiz ug Lorraine Badoy, ang gika-intapan nga red-taggers ug tigpakatap og bakak sa SMNI, niluwat dayon si Carpio og opisyal nga pamahayag nga nipasidungog sa duha sa pagbarug para sa unsay sakto.
* * *
Upat ka buwan na human sa unang pagbombardiyo sa CCG og water cannon sa barko sa PCG sa WPS niadtong Agosto ug upat ka adlaw na human sa pila ka oras nga mga bombardiyo niadtong Domingo, wa magtagad si Carpio paghimo og bisan unsang komentaryo batok sa pagpanghasi sa China.
Wa ray usa ka adlaw human gipalingkawas silang Celiz ug Badoy sa House Committee on Legislative Franchises tungod sa humanitarian grounds, nitingog dayon si Carpio aron pagdayeg sa duha niya ka higala sa pakigbisog para sa kagawasan sa pagpadayag.
* * *
Duha ka buwan na human sa unang pagbangga sa CCG sa barko sa Pilipinas sa WPS niadtong Oktubre ug upat ka adlaw na human sa ikaduhang pagbangga niadtong Domingo, way reaksiyon si Carpio bisan sa pagpadayag na lang og simpatiya sa mga tripulante nga nameligro sa panghasi sa China.
Pero wa mag-usik og panahon si Carpio sa pagdayeg sa kaisog ug sakripisyo nilang Celiz ug Badoy pagpatigbabaw sa ilang katungod ubos sa konstitusyon.
* * *
Way lalis nga angayng maghiusa ang nagkalainlaing sektor sa pagbatok sa agresibo nga pagsuway sa China sa pag-ilog sa kabahin sa atong nasudnong teritoryo. Pero nipili si Carpio sa paglingiw sa labing seryusong hulga sa atong nasudnong seguridad.
Iya hinuong gipanalipdan ang katungod nilang Celiz ug Badoy sa paggamit sa plataporma sa SMNI sa pagpatuyang paghimo og mga pasangil nga way ebidensiya, bahala na kon laktod nga gipamatay ang pipila sa ilang mga biktima. Ang pagdapig sa pamakak sa SMNI ug sa China maoy pagbatok sa kamatuoran. Ang pagbatok sa kamatuoran mao ang pagbudhi ug pakigbatok sa nasud ug sa katawhan.
* * *
- Latest
