Patuyang sa amahan ug anak
Labing unang gipangayo ni Bise Presidente Sara Duterte Carpio gikan ni Presidente Ferdinand Marcos Jr. bisan bisan wa pa magsugod ang ilang administrasyon niadtong Hunyo 2022 mao ang pagtukod sa Vice Presidential Security and Protection Group (VPSPG), buwag nga unit sa Armed Forces of the Philippines (AFP).
Usa sa labing unang findings sa Commission on Audit (COA) sa unang unom ka buwan ni Carpio sa puwesto (Hulyo-Disyembre 2022), gawas sa P125 milyones nga kuwestiyonableng confidential funds nga iyang gigasto sud sa 11 ka adlaw, mao nga duna siyay 433 ka guwardiya.
* * *
Usa sa labing unang gihimo ni kanhi Presidente Rodrigo Duterte sa iyang pagbanos sa Malakanyang mao ang pagpaburot og 252% sa confidential ug intelligence funds, gikan sa P715 milyones sa kataposang tuig ni anhing Presidente Noynoy Aquino ngadto sa P2.52 bilyones sa 2017, sa wa pa paburota ngadto sa P4.57 bilyones sa 2020 (nga gikopya ni Marcos Jr.).
Usa sa labing uwahing gihimo ni Duterte dayong kanaog sa Malakanyang niadtong Hunyo 2016 mao ang pagkuha og mga lisensiya para sa tanan niyang 358 ka mga armas.
* * *
Mahimong tangtangon g'yud sa Kongreso ug Malakanyang ang P650 milyones nga confidential funds ni Carpio (P500 milyones sa Office of the Vice President ug P150 milyones sa Department of Education) sa 2024, pero magpabilin ang iyang usa ka batalyon nga VPSPG ug 433 ka guwardiya.
Wa na sa puwesto si Duterte pero nagpabilin ang iyang proteksiyon sa Presidential Security Group (PSG), iyang influencia sa Philippine National Police (PNP) ug AFP ug iyang labing menos 358 ka mga armas.
* * *
Managsama ang amahan ug anak nga nalista sa mga dokumento sa International Criminal Court (ICC) nga gipasanginlan sa laktod nga pinatyanay sa Davao ug tibuok Pilipinas sugod sa 2011 hangtod sa 2019.
Managsamang nagtuo nga ang ilang popularidad mohatag sa tanan nilang gusto. Nga mahimo nilang gastuhon ang buhis sa katawhan bisan unsang orasa sa bisan unsang katuyoan. Nga makahudlat ug makapatay sila ni bisan kinsa ug bisan pila nga di sila ma-imbestigar sa kapolisan, di sila makiha sa korte ug di sila kapaninglan sa balaod. Hinaot nga, sa ngan sa katarung, managsama silang mapamatud-an nga sayop.
* * *
- Latest
