Hinumdumi apan ayaw saligi

Gisupak ni Bise Presidente Sara Duterte si Presidente Bongbong Marcos sa panawagan niini nga makigsabot sa kalinaw tali sa National Democratic Front of the Philippines. Gitawag sa bise presidente ang maong lakang nga  pakigsabot tali sa yawa  kay alang kaniya, walay sinseridad nga gipakita ang NDFP kon kalinaw ang hisgutan ug nga budhian lang sa mga rebelde ang kagamhanan.  May punto ang bise presidente tungod kay ginaingon man nga  ang matag relasyon gipabarog man sa pundasyon sa kamatinud-anon ug pagsalig.   Matud pa usab sa katigulangan, "Hinumdumi kanunay ang imong higala ug kaaway, apan ayaw saligi ang bisan usa kanila.   Muleeng!

Biya na sa salamin

Matud pa ni Chinese Foreign Spokesperson Wang Wenbin,  makataronganon ug legal  ang pagpakatap og 135 ka Chinese Maritime Militia (CMM) sa kadagatan sa Julian Felipe Reef kay kabahin kuno ang maong lugar sa teritoryo sa China.  Bisan sa saad sa PCG nga protektahan ang atong kadagatan, padayon nga gihulga sa China ang atong soberiniya ug igo lang kita sa pag-react pinaagi sa huyang nga mga pulong.  Kay daw gitugtan man nato ang gibuhat sa China, angayan hinuktokan nga,  Aron maundang ang pagpang-bully kanato, mobiya kita sa salamin nga atong giatubang kanunay.  Madahaan!

Please  study more

Tungod sa padayon nga pagsalikway sa China sa mga diplomatic protest sa Pilipinas, nakatuaw na lang si Senador  Bato  de la Rosa nga kinahanglan na nato ang panabang sa Ginoo kon buot gyud kita nga ipatigbabaw ang atong soberiniya diha sa West Philippine Sea (WPS).  Daw gipadayag sa senador kon unsa kita ka inutil pagsulbad sa isyu kabahin sa China.  Ang panahom sa senador wala nato madungog sa mga lider sa ubang nasud.  Dili usab tingale mag-apil-apil ang Kahitas-an niining maong panagbangi.  Agi g sumbalik sa sugyot sa senador, awhagon na lang nato sila nga,  Please Study More.   Pagkatoytoy!

Basolon ang uban

Adunay gipahigayon nga administrative investigation ang Traffic Management Council (TMC) mahitungod sa gihimo ng Christmas Tree lighting diha sa highway sa Barangay Bulacao nga nakamugna og bug-at nga trapik sa maong dalan hangtud sa Barangay Mambaling.  Ang mga gituohan nga responsable nangulipas sa ilang kalambigitan sa maong panghitabo.  Ginaingon baya nga  Ang tinuod nga lider mangako sa responsibilidad ug sangputanan sa iyang nabuhat ingon man kadtong napakyas niya pagbuhat.  Kay kon dili, sama siya g hanggaw nga magpunay lang og basol sa uban sa iyang mga kakulangon.   Fezteleern!

Maayo kita sa math

Sumala sa resulta sa gipahigayon nga pasulit sa Program for International Student Assessment (PISA) sa tuig 2022, sa ikaduhang higayon, nalandig ang Pilipinas sa 10 ka labing ubos nga nasud sa 81 ka nasud nga gipaubos sa pasulit sa natad sa reading comprehension, mathematics ug siyensya.  Adunay daghang hinungdan ngano nga iwit ang Pilipinas sa maong assessment.  Apan supak ang akong amigo sa assessment nga hinay kita sa mathematics.  Matud pa niya,  Pruweba nga brayt ang Pinoy og math mao ang mga kristo ug masyador sa buwangan.  Maayo kaayo mokwenta sa pustada nga walay lista-lista .  Tumpaaak!