Umanhi ka Mesiyas

Maayong Balita

Gipahimug-atan sa atong Ginoong Jesus ngadto sa iyang mga tinun-an ang pagkamabinantayon sa tanang panahon kay wala man kita masayud sa panahon ug takna sa pag-abot sa agalon. Dakong kalipay sa agalon nga makita ang iyang mga sulugoon nga nagtuman sa iyang gipabuhat kanila.

Kasinatian

Adbiyento na usab. Laing liturgical year. Laing kasinatian. Ang pulong Adbiyento gikan sa pulong latin Adventus nga nagpasabot og pag-abot. Atong gihandum ang unang pag-abot sa atong Ginoo sa iyang pagkahimugso ingon nga tawo. Mao kini ang rason kun nganong ang advent season nahimong unang season sa taliabot nga Christmas Season. Ang Parousia kun ang ikaduhang pag-abot sa atong Ginoo ingon nga Hari sa adlaw sa panghukom mao ang angayan usab natong pangandaman.

Lihok

Pagmaigmaton ug pagmapamalandungon sa kanunay.

Pangamuyo

Umanhi ka Mesiyas! Lamdagi ug hatagi kami og Kahayag! Ug Paglaum  nga among gikinahanglan aron kami makapadayon sa among panaw ngadto sa Amahan!