Nagkaseryoso

Nagkadako na kining panagbangi tali sa Pilipinas ug higante'ng silinga'ng China gumikan sa seryosong problema sa West Philippine Sea o South China Sea nga alang kanako agta ray nasayod kon kanus-a gayud masulbad.

Ning ulahi pa lamang, gipasiritan na usab og tubig sa Chinese navy ang kasundalohan sa Pilipinas nga naghatod og food supply sa mga sundalo nga nakabasi sa usa ka military ship nga gisangad sa Ayungin Shoal nga sakop sa teritoryo sa Pilipinas.

Mireklamo na ang atong kasundalohan niining bag-ong insidente diha mismo sulod sa exclusive economic zone sa atong nasud. Ug mipasaka na usab og protesta ang kagamhanan sa Pilipinas ngadto sa kagamhanan sa China.

Dili kini ang unang pagpang-harass sa Chinese navy sa atong kasundalohan nga naghatud og suplay sa pagkaon sa Ayungin Shoal. Adunay mga higayon kaniadto nga babagan sa Chinese navy ang kasundalohan nga magpatrolya didto sa Spratlys.

Gani, ang labing seryoso nga mga insidente mao ang pagpangtaboy sa Chinese navy sa atong mga mangigisda sa Spratlys nga sa nangaging mga dekada libre kaayo nga makapanginabuhi sa West Philippine Sea o South China Sea.

Karon, nagkaseryoso na ang sitwasyon. Samtang maisogon ang Pilipinas nga mi-claim sa katungod niini sa exclusive economic zone sa West Philippine Sea o South China Sea, dili usab magpapiri ang China pag-claim niini.

Gani, mas gihingusgan pa sa China ang military presence niini sa WPS o SCS. Kini ang hinungdan nga daghang nasud - ilabina ang Estados Unidos, Australia, Japan ug United Kingdom - ang mirebenta.

Wala koy nakitang kasulbaran sa maong problema diha sa WPS o SCS. Tungod lagi kay ang China dili gayud motamod sa nasabotan sa United Nations Convention on the Law of the Sea (UNCLOS), ngitngit pa sa alkitran ang kasulbaran sa maong problema.