Dili kabintahaan ang katahom sa Negros Oriental

Kong katahum sa dapit ang hisgotan dili usab magpaulahi ang lalawigan sa Negros Oriental nga maoy akong nasaksihan sa ikatulo ka adlaw nako nga pagtuyok sa probinsiya.

Ang mga lapyahan sa dagat hilabihan ka tahum nga daw wala pa matarug. Maagian kini kay anaa ra man gyud daplin sa karsada nga makaingon ta pagkabulahan sa mga tawo dinhing dapita nga libre ra ang tanan nga mangaligo. Public beach man pero hilabihan ka tahom.

Sa kabukiran lunhaw pa kaayo ang palibot sa kakahoyan, kalubihan ug katubhan ug kahumayan. Maisip nga bitamina sa mata nga ma-feel nimo nga at home ka sa Negros.

Sa mga dagkong syudad dili pud paulahi ang Dumaguete sa pagsulbong sa kalamboan. In fairness sa mga tawo matahaon nga mosunod gyud sa lagda sa trapiko, wala koy nakita nga traffic enforcers nga kanunay nag man sa dalan, pulos mga traffic sign lang nga walay word apan mosunod gyud ang mga motorista.

Sa panahon sa kagabhion, hipos ang mga batan-an dili lingas o makaingon nga disiplinado sila. Ambot lang kong impression ko lang, maayo unta first impression lasts.

Samot na sa kalungsoran sa Negros diin mingaw na gyud bisan sayo pa nga gabii seguro maoy ilang naandan nga pamatasan

Sa katahom nga akong nasaksihan aduna usay opposite nga talan-awon nga dayag hangtud karon mao ang kalisod sa mga kabus nga mga Negrinse.

Taliwala sa halapad nga hacienda ang mga balay sa mga kabus nga hut-ong sa lalawigan, hinuon dili lang sa Negros kini nga kaso bisan gani sa mga malamboon nga probinsya naa gyud ang kakabus.

Kadtong mga nabiktima sa Pamplona massacre mora’g tanan mga kabus man gawas lang ni Governor Roel Degamo nga maoy nangunay sa paghayag sa ayuda ngadto sa mga tawo.

Ang panghitabo nakatay-og sa tibuok lalawigan nga nagbilin og trauma sa mga molupyo. Unta dili kini mograbe pa aron mas mopatigbabaw ang kaanindot sa dapit aron mas daghang mga turista nga mobisita sa ingon makapasulbong sa ilang ekonomiya nga dakong matabang sa paghaw-aw sa kalisod sa mga tawo pinaagi sa trabaho ug daghang oportunidad nga mamugna  niini.