Hybrid nga con-con

Aprobado na sa House of Representatives ang balaodnon alang sa pag-usab sa Batakang Balaod.

Dunay 301 ka mga kongresista nga mibotar pabor sa balaodnon samtang pito ang supak. Ug basi sa listahan sa mga kongresista nga nisupak.way bisan usa nga gikan sa Sugbo.

Pasabot niini nga ang pito ka mga kongresista sa lalawigan sa Sugbo ingon man ang duha sa dakbayan sa Sugbo ug mga representante sa lone district sa Lapu-Lapu  ug Mandaue pabor sa pag-usab sa atong Konstitusyon.

Sigun sa giaprobahan nga balaodnon sa Kongreso, hybrid ang paagi pagpili sa mga maglangkob sa constitutional convention.

Dunay mga delegado nga pilion sa matag distrito ug duna say itudlo gikan sa Kongreso.

Ang pagpili sa 316 ka mga delegado himoon dungan sa Barangay ug SK elections niining tuiga.

Ang mga kandidato isip con-con delegate kinahanglang nag-edad og 25 anyos pataas, Filipino citizen, ug at least college graduate.

Ang mga modaog magsilbi isip con-con delegate gikan sa Nov. 21, 2023 hangtud sa June 30, 2024.

Sulod sa pito ka buwan nilang termino magdawat sila og sweldo nga P10 mil matag-adlaw o di mominus sa P300 mil ang buwan.

Sa ato pa dakong kantidad sa salapi ang gikinahanglan alang niini. Sigun sa bana-bana moabot og mga P9.5 bilyones ang pundo nga gikinahanglan pag-usab sa atong Batakang Balaod.

Sa kadako sa pundo nga gikinahanglan makapangutana ta og kini bay labaw tang gikinahanglan taliwa sa krisis sa ekonomiya ug sa kataas sa inflation rate sa nasud.

Mabadlong ba pinaagi sa pag-usab sa Batakang Balaod ang pagsulbong sa presyo sa mga palaliton?

Unsay kasiguroan sa katawhan nga economic provision ray usbon? Wa say garantiya ang publiko nga ang mapili nga mga delegado maantigo sanglit lugak ang requirement sa mga mahimong mokandidato diha sa giaprobahan nga balaodnon.

Kun college graduate ray minimum requirement sa mahimong mopapili isip delegado, piligro nga mababoy ang eleksiyon sa mga naglingkod sa gahom pinaagi sa pagtuboy sa ilang pamilya.

Sanglit mopanday man sa Batakang Balaod ang atong pilion, angayan unta nga labing minus nga qualification mao ang pagkaabogado.