Gintang

Karong adlawa ihatod ngadto sa iyang  kataposang pahulayanan si Negros Oriental Governor Roel Degamo nga gipatay sulod mismo sa compound sa iyang panimalay atol sa pagpanghatag og tabang sa mga nangayo niya og tabang.

Apan gawas sa gobernador, adunay laing walo ka tawo nga namatay dihang gipatay ang gobernador nga mao sila si Jessie Bot-ay nga taga Santa Catalina; Konsehal Jose Marie Ramirez nga taga Santa Ata, Pamplona; Jerome Maquiling, taga Canduay, Dumaguete City; Jomar Canseco taga Poblacion, Pamplona; Crispin Vallega nga driver ug security; Qunikito Florenda Lovitana, Joseph Netada ug Michael Gidan Fabugais.

Gawas sa mga namatay, adunay 14 ka tawo nga nalandig sa tambalanan nga gilangkoban nila ni Fred Cafe, Chyrell Garpen, Corporal Gerald Malones, David Cortes, Mario Quilnet, Vickmar Rayoso, Mayben Jun Torremocha, Sarhento Edmar Sayon, Dr. Liland Estacion, Rosa Banquerigo, Raymond Barolestor Kris Arnold, Domedies Umatang ug laing wala pa mailhi. Duha ang nasamdan nga wala na magpa admit sa tambalanan. Ang haya sa gobernador giduaw sa mga tag-as nga opisyal sa nasud nga gipangulohan ni Presidente Ferdinand R. Marcos Jr., mga senador, mga kongresista, mga gobernador, mga mayor ug uban pa.

Apan wala gayod bisan usa kanila ang mibisita sa laing walo nga namatay. Wala pod bisan usa kanila ang mibisita sa mga naangol nga anaa sa tambalanan. Wala gani niining maong mga opisyal ang nakahinumdom sa uban nga mga biktima. Kini ang labing buhi nga kamatuoran nga atong makita sa gintang sa kabus ug adunahan, taas ug ubos sa atong katilingban.

Samtang dili ikalimod nga ang kasulbaran sa kaso sa gipatay nga gobernador kasulbaran usab sa kaso sa mga nadamay apan dili pod nato ikalimod nga makapahiubos ang gihimo sa atong tag-as nga mga opisyal.

Naa ra man gud nahimotang sa usa ka probinsiya, siyudad o lungsod ang haya sa ubang biktima ug mga nalandig sa tambalanan apan wala gayod sila mahapit sa atong mga tag-as nga opisyal. Kini tungod kay wala sila mailhi ug bisan nailhan ubos ra ang ilang posisyon sa katilingban. Mao ni ang gintang.