Pagarpar di makahiyos sa inflation
Nausab ang tuno ni Presidente Ferdinand Marcos Jr. sa pagburot sa inflation rate sa Pilipinas ngadto sa 8.7% sa Enero, kinapaspasan nga pagsulbong sa presyo sa mga palaliton ug serbisyo sukad sa 2008:
Sa niaging tuig, gilalis niyang Philippine Statistics Authority (PSA) ug niinsistir nga di taas ang inflation rate sa Pilipinas (way nakahunghong nga ang PSA ahensiya sa gobyerno ug opisyal ang ilang data);
Karong tuiga, giangkon niyang mas taas nga numero sa PSA pero naneguro nga mao na ni kinatas-an ug mo-us-os na sugod sa second quarter.
* * *
Gawas lang kon duna siyay bolang kristal, ug kon may magic pa sa paglili sa umaabot taliwa sa kalibotanong kayagaw, di pa ta angay'ng magsaulog sa iyang pasalig. Kay kapila na siya niinsistir nga kontrolado sa iyang administrasyon ang sitwasyon–gipalambo nang produksiyon ug supply chain ug mo-abunda nang suplay ug mobarato nang presyo–pero hangtod karon wa pay napakita nga maayong resulta.
Mas dakong eskandalo nga kasagaran sa mga nagnihit ug nimahal pag-ayo maong mga produkto sa agrikultura nga giduma sa departamento nga gipamugos sa pagpaubos sa taphaw niyang pagduma.
* * *
Mas ngilngig ang pasalig ni Finance Secretary Benjamin Diokno: Mo-ubos ang inflation rate karong first quarter. Usa sa iyang gipasikaran maong pagbarato sa lana. Bahaw ang iyang balita. Sa akong pagsuwat ini, nisulbong ang presyo sa lana sa world market og kapin 3% tungod sa gipaabot nga pagsaka sa demanda sa China.
Gawas pa, nasupalpal na si Diokno ning iyang sulti niadtong Agosto 17, 2022: "Inflation hit 6.4 percent last month but I bet this has already peaked."
* * *
Pagdason nilang Marcos ug Diokno, ang Office of the Press Secretary nidangop sa kinaham nga palusot nga mao ang pagpahinumdom nga ang pagsaka sa inflation rate di angay'ng ika-alarma kay nahitabo sab sa tibuok kalibotan (gawas lang kon ang imong kita di nang kaabot sa presyo sa inadlaw'ng mga palaliton).
Hinaot nga dutlan og bisan gamay na lang kauwaw ang administrasyon kon makabasa sa mas ubos nga inflation rate sa atong silingang mga nasud:
· Malaysia: 3.8%
· Vietnam: 4.89%
· Thailand: 5.02%
· Indonesia: 5.28%
* * *
- Latest
