Kaluhang sakyanan kaluha pud og plaka, pwede ba?

Naglabad ang ulo niining duha ka mga nanag-iya og sakyanan kinsa pareho nakapalit og susamang car dealer sa dakbayan sa Sugbo. Second hand ang ilang mga napalit nga sakyanan busa medyo nakabarato sila itandi sa brand new nga hilabihang mahala gyud.

Wala sila magdungan sa pagpalit og sakyanan, pero pareho og model ug color ang mga sakyanan nga mora’g kaluha. Walay problema kong ingon niini lang kay daghan man gyud managsama og hitsura nga mga sakyanan, apan ang dakong problema kay managsama man sila og plate number nga dakong kalapasan sa lagda sa balaod.

Sumala sa unang biktima nga sa sinugdanan walay problema silang nasugatan,  dali na-release nga kompeleto gyud sa mga papales. Nindot ang ilang gibati nga wala gyud mahasol, nindot pud og dagan ang sakyanan.

Dihang gipa-renew na niya ang car registration dinhi na naglabad ang iyang ulo kay nasangit man dihang nadiskobrehan nga adunay susama og plate number.  Pastilan unsaon nalang.

Nidangop sa Highway Patrol Group ang unang reklamante ug miaksiyon usab dayon. Naimbitahan nila ang tag-iya sa laing sakbayan nga pareho og hitsura ug plate number sa naunang reklamante.

Nagkaabot gyud sila sa atubangan sa hepe sa HPG 7 diin gipadayag sa ikaduhang nakapalit sa laing sakyanan nga wala siya masayod nga kwestyonable ba diay ang napalit nga sakyanan.

Ang duha parehong nangayo og pagpasabot sa car dealer apan wala kuno sila tagda o unya-unyaon. Sus kong ingon niini ang gihimo sa nagbaligya sa mga sakyanan gikinahanglan nga tinud-on gyud kini sa mga nabiktima nga customer ug sa mga otoridad.

Walay laing mabasol niini ang dealer kay nalutsan sila og mga sakyanan nga kwestyonable ug gipamaligya pa gyud nila sa pagdahum nga dili masakpan.

Matud sa hepe sa HPG-7 nga dili layo ang posibilidad nga ang mga sakyanan gikan sa ubang dapit og diri sa Sugbo gipahimoan og dokumento kay posibleng nakuha kini sa gitawag nilang technical carnapping sama sa rentangay nga dugay nang problema.

Didto ra man unta kini sa kaulohan apan karon naa naman usab sa probinsya nanglihok ang mga nalambigit sa ingon niini nga binuhatan.

Mao lagi ni ang leksiyon sa mga gustong mopalit og barato ilabi na sa mga second hand nga sakyanan nga moduol sila sa mga ehensiya sa kagamhanan aron masuta kong limpyo ug legit ang mga dokumento aron segurado sa dili pa kini paliton. Kay mora’g naglabay lang sa kwarta sa basura kong mabawian og sakyanan, mapasakaan pa og kaso, sus ka dakong problema.

Matngon lang yud, makabarato lagi pero kong mataymingan impas pud ang hinagoang kwarta.