EDITORYAL-Way aso nga makumkom

Gipadak-an ang sweldo ug mga benepisyo aron dili matintal pagsulod og ilegal nga binuhatan, apan duna pa gyud gihapoy pipila nga padayon sa ilang dautang tumong samtang nagserbisyo kunohay sa Philippine National Police.

Subo kaayong pamalandungon nga ang organisasyong gisaligan sa katawhan nga kapangayoan og proteksyon, duna diay mga sakop nga mga kriminal nga ang ilang uniporme maoy ilang gigamit nga takuban sa paghimo og krimen. Usa ka polis nga hapit na gani moretiro sa serbisyo ang gidakop sa mga kaubanan niyang polis gikan sa Integrity Monitoring and Enforcement Group-7 tungod sa pagpangilkil dihang usa ka motorista ang matud pa mireklamo.

Ang motorista giingong gidakop sa usa gihipahigayong police checkpoint diha sa Brgy. Mambaling sa Cebu City, wala hinuon madetalye sa IMEG-7 kun unsay violation niini nganong gidakop man kini sa checkpoint.

Apan mialegar ang maong dinakpan nga gikilkilan hinuon siya sa maong gireklamo niyang polis hinungdan sa pagdangop niya sa IMEG-7 ug gilusad ang entrapment operation nga niresulta sab sa pagkasikop sa maong polis.

Wala pa masayri kun una pa ba niya kining gibuhat, kun duna pay laing mga nabiktima aning maong polis mahimo na kamong mopatim-aw aron makaangkon og hustisya sa krimeng iyang gihimo nganha kaniya gamit ang uniporme sa PNP.

Pwerteng laina paminawon nga polis dakpon og kaubang polis. Dili man sab dakpon kun nagtinarong sa trabaho.

Anugon kaayo ang taas nga katuigan sa panerbisyo nga mawala lang sa usa ka pamilok kay natintal sa kwarta unya may pakapin pang pagkabilanggo.

Ang nakapait, gigamit niini ang impluwensiya ug gahum sa PNP sa paghimo niini. Pwerte gyung paita para sa mga sibilyan ug yanong mga tawo kun binuangan og mga naa sa katungdanan unya walay kadaganan aron makapangayo og katarungan.

Kagumkom nga saludo para sa IMEG-7 ug sa mga opisyal nga nagpaluyo niini, kay dunay sama nila nga unit nga pwedeng madangpan sa mga yanong tawo kun sila abusaran sa mga polis nga nahubog sa gahum ug sa ilang uniporme.

Magsilbi unta kining leksyon alang sa tanang mga polis, bag-o man o mga karaan, nga walay aso nga makumkom kay sa kadugayan masakpan ra gyud gihapon, di pa karon, basin ugma o mosunod nga mga adlaw.