Way kapuslanan

Hisgotan nako kini pag-usab aron gyud masabtan sa kadagkoan sa Land Transportation Office (LTO) nga palpak kining ilang paagi nga gipatuman nga ang online examination sa mokuha’g driver’s license pwede ra adto himoa sa balay.

Nahinabi nako ang akong higala nga opisyal sa Land Transportation Office (LTO) ug iya ko nga gitug-anan nga bisan siya wa modayeg niining paagi nga ang mga mokuha og driver’s license kinahanglang mopasar sa online test.

Ako man gud siya nga gitug-anan nga samtang nindot ang tumong nga kinahanglang mopasar sa examination ang mokuha og driver’s license, apan ang sayop kay gitugot man nga ang pagtubag sa pangutana, himoon bisan asa.

Gitugot ra man gud nga adto sa balay tubagon ang mga pangutana sa online, ug i-print ra ang resulta sa test, nga maoy dad-on ug ipakita ngadto sa LTO kon molukat na og driver’s license.

Sa ato pa, pwede ra nga laing tawo ang motubag sa mga pangutana. Kon ipatuman man gyud gani kining maong paagi nga kinahanglang mopasar sa online test sa LTO ang mga mokuha’g lisensya sa pag-drive, kinahanglang adto kini himoa sa LTO.

Pero ang akong komentaryo, pwerteng dalia ra sab sa oras nga gihatag aron tubagon ang 25 ka pangutana. Mga tres minutos ra tingali, ug inig human nimo’g tubag, ingnon ka na sa computer nga nilapas ka sa gitagal nga oras.

Usbon nako, kon ipadayon man gani kini, kinahanglang adto gyud sa LTO himoa ang online examination aron makita gyud kon makapasar ba ang applicant pagkuha’g driver’s license.

Kon dili man gani makaya kay kuwang ang LTO og mga computer nga magamit, mas maayo pa og wad-on na lang na ug pasalmoton na lang og seminar ang mga mokuha’g lisensya.

* * *

Nindot ang gihimo ni Cebu City Mayor Michael Rama nga gipangsuspenso ang mga kawani sa City Hall nga mga tikasan ug mga ligoy.

Ang akong gipasabot mao ang pagsuspenso og usa ka buwan sa trabahante sa City Hall nga maoy mopanso sa mga daily time record (DTR) sa daghan niyang mga kauban sa trabaho.

Apil nga gipangsuspenso og tag 15 ka adlaw, mao ang mga tag-iya sa DTR nga gipanso sa maong kawani. Maayo ra, aron motagam.

Tingali kadtong mga kawani nga iyang gipangpanso, dugay tingali nga moreport sa ilang opisina, ug kay may DTR man nga kinahanglang ipanso sa machine, manugo na lang sa kauban nga ipaapil ang ila.

Mga tikasan! Kompleto ang sweldo nga gidawat gikan sa kagamhanan sa siyudad, apan kuwang ang ilang mga serbisyo.