Bahala’g pobre basta way anghit

Kinaiya sa kadaghanan sa mga Pilipino ang kanunay gyud nga pagpanglimpiyo sa lawas.

Tungod sa maong kinaiya sagad nato kaduha maligo sa usa ka adlaw——kausa sa buntag ug usbon sa gabii dayon og katulog

Apan dunay mga tawo nga bisan pa og kapila maligo duna gyuy baho ang lawas. Kini maoy hinungdan nga gikinahanglan ang paggamit og mga produkto—natural ug synthetic— aron pagkontrolar sa baho.

Makauuwaw ang baho sa lawas labi pa ang anghit sa ilok. Mahimo ni nga hinungdan aron ka likayan sa tawo lakip na sa imong mga higala.

Kun nahibulong ka nga inig-abot nimo sa pundok sa imong mga higala mokalit lang sila og kabungkag ug mag-iyahay og lansis aron mopalayo nimo labing siguro baho ka og ilok.

Dili sa pag-inarte apan dili gyud maagwanta ang baho sa ilok labi pa og anaa ka sa mga publikong dapit o ba kaha sa pampublikong sakyanan.

Pait gyud tinuod kun ang imong katupad diha sa jeep o tricycle baho og ilok. Ug tingali ang mga sakop sa konseho sa Barangay Pooc sa dakbayan sa Talisay dunay kasinatian nga sama niini hinungdan nga karong bag-o ilang gipasar ang ordinansa nga magsilot sa mga e-trike drivers sa ilang barangay nga baho og ilok.

Sigun sa ilang ordinansa, dunay multa nga P100 alang sa unang kalapasan, P200 sa ikaduha ug P1,000 kun ikaw madakpan sa ikatulong higayon.

Kadtong mga e-trike drivers nga di gyud kamao manglimpiyo sa ilang lawas ug mangalisbo ang baho kumpiskahon ang ilang e-trike ug dad-on sa barangay hall.

Kataw-anan ang maong ordinansa tungod kay di naman gyud unta kini angayan. Responsibilidad sa matag tawo ang pagpanglimpiyo sa iyang kaugalingon ug pagsiguro nga siya presentable.

Dili kinahanglan nga kanunay’ng bag-o o mahalon ang sinina. Ang importante nga kini limpiyo bahala og tinapakan o gisi. Matud pa nila nga bahala og dili tantong gwapo ug gwapa basta ang importante kanunay’ng humot.

Dili rason ang imong kakabos aron dili kapanglimpiyo sa lawas. Wala kinahanglana ang mahalon nga mga deodorant aron dili kang manimaho.

Kun wala kay ikapalit og mahalon nga deodorant dunay tawas nga labihan ra kabarato ug namatud-an na nga epektibo batok sa anghit.

Ug batasana ang kanunay nga pagpanghugas sa imong ilok gamit ang sabon. Kun dunay punoan sa bayabas sa inyong dapit pagkuha og udlot niini og iitos sud sa pipila ka minuto.

Ang linaga nga udlot sa bayabas maoy gamita pagpanghugas sa imong ilok sa dili pa nimo banlawan. Human niini nudnuri og tawas.

Mao ni pinobre apan epektibo nga paagi pagtambal sa baho sa imong ilok.