Respeto gikinahanglan nga mabatnan sa mga motorista sa tanang oras kun magmaneho diha sa kadalanan.
Kini aron magpabilin ang kalinaw ug kaluwasan sa mga road users sa tanang oras.
Pipila ka adlaw na ang nakalabay dihang dunay nahitabong road rage sa dalan Hernan Cortes sa Dakbayan sa Mandaue.
Ang insidente niresulta sa pagpamusil sa wala mailhing tawo nga nag-awto ngadto sa lalaking nagmaneho og motorsiklo kauban ang kapuyo niini.
Nigawas sa imbestigasyon nga nagkalalis ang suspek ug ang biktima human matud pa diriyot maigo sa awto sa suspek ang managkapuyo.
Apan nisangpot kini sa pagpamusil ug gikamatay sa drayber sa motor. Maayo nalang nga wa ra maunsa ang kapuyo niini.
Kung dunay respeto ang mga drayber sa kaparehaa nilang drayber way panagtrokis nga mahitabo.
Kining mga dagkong sakyanan mokonsiderar sab unta sa gagmay nga sakyanan.
Samtang ang mga motor di usab unta magpataka og lusot nga makahatag og hasol sa ubang mga drayber.
Dili unta kalimtan ang "Give Way" o "Yield" nga tamdanan sa mga drayber.
Aron tanan hapsay ug luwas nga makauli sa tagsa-tagsa ka mga panimalay.