Sapatos sa mga kolektor sa buhis
Daghang nihangop sa pasalig sa sunod nga tagduma sa National Economic and Development Authority (Neda) nga si Arsenio Balisacan: Way bag-ong buhis pero tarungon sa pagkolekta ang karaang mga buhis. Isog ang iyang sulti kay direkta niyang gisalikway ang rekomendasyon sa economic managers ni Presidente Rodrigo Duterte.
Para niya sayop ang ilang pasidaan nga kon di mapatuman ang bag-ong mga buhis maglisod ang sunod nga administrasyon sa pagpalambo sa ekonomiya ug pagbayad sa dakong utang nga mahibilin sa pagbiya nilang Presidente Duterte ug kaubanan sa udtong tutok karong Hunyo 30.
* * *
Pero kuwang ang mga detalye ni Balisacan unsaon pagpalambo ang koleksiyon sa buhis inig banos na ni President-elect Ferdinand Marcos Jr. sa Malakanyang. Maong kasagaran sa mga kahinangop gisagolan og panagana. Nga kutob ra siya sa istorya. Kay wa siya matawo gahapon ug nahibawo sa kalisod sa koleksiyon.
Nabantog si Balisacan sa iyang kaligdong ug katakos sa pagserbisyo sa mga administrasyon nilang anhing Presidente Noynoy Aquino ug Presidente Duterte. Pero way garantiya nga iyang malimpiyohan ug mapabaskog ang burukrasya nga mas gikaintapan sa way kinutobang mga palusot ug pangurakot.
* * *
Ang elepante nga wa hisguti ni Balisacan, nga nabantang sa tanang ni-abiba sa iyang plano, mao ang kinadak-an nga buhis nga kolektahunon sa sunod nga administrasyon: Ang P203.8 bilyones nga utang sa estate tax sa pamilya sa president-elect nagtudlo niya.
Kon di mobayad ang mga Marcos, sama nga ila rang gi-isnab ang paningil sa Bureau of Internal Revenue (BIR) sa niaging 33 na ka tuig, unsaon man pagkumbinser ang ubang mga magbubuhis sa pagtuman sa ilang obligasyon?
* * *
Kon ang pa-goryo-goryo ni Balisacan sundon sa burukrasya sa mosunod nga unom ka tuig, unsaon man pagdugang sa koleksiyon sa buhis? Nga bisan ang mga tarung nga tigkolekta (ganahan kong molaom nga mayoriya sa taga BIR, Customs ug ubang ahensiya wa pa malamoy sa mga binuang) di na man kahibawo kanus-a motinuod og paningil ug kanus-a molingiw lang?
Kon di pabayron ang mga Marcos, unsay sa mga negosyante nga mangangkon nga nakatabang pagpabalik sa mga Marcos sa Malakanyang mahitabo sa pag-demanda sa samang pabor? Daghang magub-an og sapatos kay magkinto ang tanang kolektor sa buhis.
* * *
- Latest
