Patuboon ang estatuwa

Buot ni Presidente Duterte nga buhatan og mas dakô nga estatuwa ang Pilipino’ng bayani nga si Lapulapu, kay alang sa Presidente, dili makatarunganon nga mas dakô pa hinuon ang rebulto ni Magellan kon itandi sa atong bayani.  Makiangayon nga himoan og mga dagko’ng estatuwa ang atong mga bayani, dili kay sama lang ang gidak-on sa duwende.  Apan sama sa atong kabataan nga naghigos ang lawas ug napuroko ang gitas-on kay kulang sa nutrisyon, nikuyos usab ang estatuwa sa atong mga bayani tungod tingale sa kakulang sa budget. Sugyot sa akong amigo, inig gama sa rebulto, mas maayo tingale nga sagolan og “yeast” ang masa sa semento aron, sama sa pan de sal, motubo usab kini.  Pagkatoytoy!

Nakigkumboya sa kanihit

Giaprobahan na ni Agriculture Secretary William Dar ang importasyon sa mokabat 60,000 ka metriko tonelada’ng isda’ng galunggong kon budboron alang sa unang trimestre sa tuig 2022 sa tumong nga madugangan ang lokal nga produksyon sa isda. Daw wala na ma’y tingusbawan ang kahimtang sa fishery sector sa nasud.  Mora’g haum ang panultihon nga, “Dili kanihit ang hinungdan sa kagutom kon dili ang kahadlok ug kahiktin sa panghunahuna”.  Sa laing bahin, ang kakulang sa suplay sa isda makapahinumdom kanato sa lain’g panultihon nga, “Adunay ganti ang makigkumboya sa kanihit kay sa makig-abin sa paghinobra”. Hala no!

Wala magkasinabot

Giklaro ni Labor Secretary Silvestre Bello III nga exempted sa “no vaccination, no ride/entry policy” kadtong wala pa mabakunahi o partial nga nabakunahan nga mga trabahante.  Dugang pa sa Kalihim, maapektohan pag-ayo ang ekonomiya kon hugot nga ipatuman ang maong polisiya.  Lain na usab kini’ng kapalpakan sa kagamhanan.  Tataw nga walay koordinasyon sa mga hingtungdan’g ahensya (DOTr ug DOLE), mao nga miresulta sa hatag-bawi nga polisiya. Haum ang panultihon nga, “Ang nag-inusara’ng labing dako nga problema sa komunikasyon mao ang sayop nga pagtoo nga adunay nahitabo’ng komunikasyon”.  Baya no!

Leadership by example

Alang kang Cebu City Mayor Michael Rama, kadtong mga barangay kapitan nga nagdumili pagpabakuna angayan nga mo-“shape up or ship out”.  Alang sa Mayor “leadership by example” ang angay ipakita sa mga barangay officials.  Kuyaw baya ang awhag nga “leadership by example” tungod kay ginaingon nga mao kini ang labing mananakod nga matang sa pagpangulo.  Mao bitaw kuno nga halapad ang kurapsyon sa kagamhanan, tungod kay nisunod man ang tanan sa gibuhat sa leader.  Fezteleern!

Nalimot sa hitsura

Taliwala sa hulga sa mas makatakud nga Omicron variant, mitambag ang mga eksperto sa pagsul-ob og surgical mask dugang sa panapton nga face mask tungod kay dili kuno makasarang ang cloth mask lang.  Ni’ng padayon nga hulga sa COVID-19, padayon pa gihapon ang atong pag-amping.  Sa kadugay na nga pagsinul-ob nato sa maskara, dako’g posibilidad nga malimot na kita sa atong tinuod nga hitsura.  Basin kinahanglan na usab unya moproklamar ang Presidente og “Adlaw sa Pag-ila-ila sa Kaugalingon”.  Madahaan!