Naanad ang mga tikasan

Panahon sa eleksiyon sagad nimong madunggan gikan sa mga kandidato ang panultihon nga nagkanayon: “Kan-a ang paon, iluwa ang taga.”

Aghat ni sa mga kandidato ngadto sa mga botante nga nagpasabot og panikas sa eleksiyon pinaagi sa “vote buying” o pagpamalit og boto.

Pasabot sa maong karaang panultihon mao nga kun dunay kandidato nga mopalit sa inyong boto, dawaton ang kwarta apan ayaw og botar niya.

Dili ni bag-o ug sigurado ko nga ang mga opisyal sa Comelec dugay rang nasayod niini.

Apan karong bag-o nakamugna og kontrobersiya ang paggamit ni Bise Presidente Leni Robredo sa maong karaang panawagan sa botante dihang miluwat og pamahayag ang tigpamaba sa Comelec nga si Atty. James Jimenez agi og reaksiyon sa panawagan ni Robredo.

Matud ni Jimenez dili husto ang gihimo ni Robredo tungod kay nagdasig kini sa mga botante pagbaligya sa ilang boto.

Tinuod nga bisan kanus-a dili husto ang pagbaligya sa imong sagradong katungod pagpili sa mga tawo nga angayang tugyanan sa renda sa pangagamhanan.

Apan mabasol ba nimo kun dunay mga kandidato nga desperado tungod sa kapakyas sa ahensiya nga gitugyanan pagbadlong niini?

Pila na ba ka mga kandidato ang napapriso o bisan gikiha nalang sa Comelec tungod sa pagpamalit og boto?

Dili ba gipasagdan ra man sab sa Comelec ang tawtaw nga kalapasan sa mga kandidato panahon sa eleksiyon?

Pananglitan unsa bay gibuhat sa Comelec aron badlongon ang pagpanghakot sa mga kandidato og botante aron iparehistro? Atol sa adlaw sa piniliay dayag og tataw ang hinakutay nga gidili sa balaod.

Diha pay mga sample ballots sa mga kandidato nga gipatabanan og kwarta nga nangasakmit atol sa checkpoint apan way bisan usa ka kandidato nga gikiha sa Comelec.

Kanunay nilang rason mao nga kuwang sila og mga sakop o ba kaha dili mahimong sila ang moreklamo aron paglikay nga kapasanginlang dunay gidapigan.

Tambaloslos! Nganong di gamiton sa Comelec ilang gahom pag-imbistigar o ang kapolisan nga deputized sa ilang ahensiya panahon sa eleksiyon?

Naanad ang mga tikasan nga politiko paghimo sa tataw nga mga kalapasan sa lagda sa eleksiyon tungod kay sila nasayod nga inutil ug way ngipon ang Comelec paggukod nila.