Bakuna sa China

Gitug-an sa director sa Center for Disease Control and Prevention sa nasud sa China nga si Gau Fu nga minus ang pagka epektibo sa ilang bakuna nga hinimo sa Sinopharm ug Sinovac. Ang Sinopharm gipanag-iya sa gobiyerno sa China samtang ang Sinovac usa ka pribadong nga kompanya nga gipanag-iya sa taga-China.

Atong nahibawan nga ang bakuna sa Sinopharm una nga nakasulod sa Pilipinas pinaagi sa palusot. Mao kini ang giingon nga gibakona sa mga sakop sa Presidential Security Group ug pipila ka mga sakop sa gabinete ni Presidente Rodrigo Roa Duterte.

Ang Sinopharm nga bakuna mao usab ang gigamit nga bakona sa United Arab Emirits (UAE). Mao ni ang gibakuna sa Overseas Filipino Worker (OFW) nga taga Mandaue nga nagtrabaho sa  UAE nga nagpositibo gihapon sa COVID-19 bisan pa man og nakompleto na niya ang duha ka dose sa bakona.

Kun wala ko masayop mao usab kini ang gibakuna sa tigpamaba sa Malakanyang nga si Secretary Harry Roque nga nagpositibo gihapon sa COVID-19 human siya nabakonahan.

Ang bakuna sa Sinovac nga gidonar sa China sa Pilipinas mao ang gibakuna sa mga frontliners nga maoy giuna sa pagbakuna tungod sa matang sa ilang trabaho.

Daan nang nasayran sa mga hanas sa medisina ug mga opisyal sa panglawas sa Pilipinas nga 50.4 porsiyento lamang ang pagka epektibo sa bakuna nga ginama sa Sinovac apan ilang giingon nga puwede ra gihapon kining gamiton.

Karon ang director na mismo sa Center for Disease Control and Prevention sa China nga si Gau Fu ang mitug-an nga minus ang pagka epektibo sa ginama nga bakuna sa ilang nasud ug ang ilang gobiyerno naglaraw sa pagtipon sa duha ka mga bakuna sa Sinopharm ug Sinovac aron mokusog ang pagka-epektibo niini.

Labing seguro ang gitug-an ni Gau Fu ang hinungdan nganong ang mga nabakunahan sa Sinopharm natakdan gihapon og COVID-19 samtang ang sa Sinovac dili pod makahatag nato og kaseguroan nga dili na matakdan ang mga nabakunahan niini.