Padayong pagbaliwala sa health protocol
SAKSAK SINAGOL - Lucky Malicay (Banat) - November 18, 2020 - 12:00am

Wala na ko matingala pa sa aksiyon sa kagamhanan nga lokal sa dakbayan sa Sugbo pagpahugot sa siguridad sa siyudad batok sa coronavirus disease o COVID-19 taliwala sa pagsaka sa mga bag-ong kaso sa maong sakit.

Ang dako nakong gikatingad-an mao ang walay pagpakabana sa uban dinhi sa siyudad sa dakong risgo nga dala sa coronavirus disease nga misangpot sa padayon nga pagsaka sa numero sa mga bag-ong nataptan niini.

Kun padayon kining maong pagsaka sa mga bag-ong kaso sa COVID-19 dinhi sa dakbayan, basin baya kun makadesider ang nasyonal nga pangagamhanan pagdeklara na usab og mas hugot nga quarantine dinhi.

Basi sa rekord sa Department of Health, sunodsunod ang pagsaka sa bag-ong COVID-19 cases sa dakbayan sa niaging mga adlaw. Kini human usab sa pipila ka semana nga pagkubos niini gumikan sa higpit nga pagpatuman sa mga health protocol.

Gani, adunay usa ka higayon nga miabot gayud og 59 ka bag-ong kaso sa coronavirus disease sulod lamang sa usa ka adlaw. Kini nga numero normal niadtong ilalum pa ang atong siyudad sa enhanced community quarantine.

Klaro nga resulta na kini sa pagkagahi usab sa ulo sa pipila nga mibaliwala lamang sa mga health protocol, kumpiyansa lagi kay nagtuo nga padulong na gayud nga mawagtang ang virus sa siyudad mao nang magsige na lamang og panggawas sa ilang panimalay.

Karon miabalik na usab ang pagsaka sa mga bag-ong kaso sa COVID-19 dinhi sa dakbayan. Tungod niini, mobalik na usab kita ngadto sa mas hugot nga implementasyon sa mga lagda batok niining maong balatian.

Ug nagpasabot kini sa hugot na usab nga presensiya sa otoridad, ilabina sa kapolisan, sa kadalanan. Kini aron pagkontrol niadtong mga anaa sa gawas, ilabina niadtong mibaliwala lamang sa lagda batok sa COVID-19.

Dili usab nato mabasol ang lokal nga pangagamhanan kun agresibo ang aksiyon niini batok sa pagsulbong na usab sa bag-ong mga kaso sa maong balatian. Kay lagi dili na maka-afford ang atong mga opisyal nga mobalik pa kita ngadto sa ECQ status.

Giawhag na ni Secrtetary Roy Cimatu ang lokal nga kagamhanan paghimo og paspas nga aksiyon batok sa nagsakang kaso sa COVID-19 sa siyudad. Taliwala usab kini sa order ni Mayor Edgardo Labella paghugot sa mga checkpoint aron pagkontrol sa pakuyanap sa virus.

Hinuon, magsilbing leksiyon kining dili maayong kalamboan alang kanato, ilabina niadtong mga gahi og ulo nga nagpatuyang lamang sa ilang pagbaliwala sa nga health protocol. Dili gayud mapildi kining maong kontra kun pabiling kitang mokumpiyansa.

HEALTH PROTOCOL
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with