^

Bag-ong sentro sa kagamhanan

LINTUNGANAY - Fred Languido (Banat) - November 8, 2020 - 12:00am

Lainlain ang reaksiyon sa publiko sa plano ni Gobernador Gwen Garcia nga balhinon ang mga buhatan sa kapitolyo didto sa lungsod sa Balamban.

Si Garcia naglaraw pagtukod og provincial government center didto sa Balamban nga maoy magsilbing bag-ong sentro sa kagamhanan sa lalawigan.

Ang probinsiya migahin og P550 milyones alang sa pagpalit og luna nga tukuran sa proyekto apil na sa development niini.

Ang mga pagsupak maisip nga normal sa bisan unsang matang sa kausaban, labi pa og matugaw ang komportableng kahimtang sa usa ka tawo.

Natural nga batasan sa tawo ang mosupak sa mga butang nga batok sa iyang personal interest.

Busa dili ikatingala nga dunay mga tawong mipadayag na og pagsupak sa maong plano karon pa lang.

Apan kun atong ablihan ang atong mga hunahuna ug palapdan ang pagsabot, tingali atong matugkad nga makiangayon ang maong plano.

Mga molupyo sa lalawigan sa Sugbo maoy giserbisyohan sa Kapitolyo ug tingali angayan lang nga ang mga buhatan niini ipaduol sa katawhan nga maoy ilang giserbisyohan.

Ug ang lungsod sa Balamban maoy labing haum nga dapit tungod kay nahimutang ni sa sentro sa lalawigan.

Nagkigsawo ang Balamban og utlanan sa dakbayan sa Sugbo nga dali ra nga maabot pinaagi sa transcentral highway.

Alang sa mga molupyo sa probinsiya nga dunay transaksiyon sa kagamhanan sa lalawigan, mas sayon ug dali alang nila ang Balamban kay sa dakbayan sa Sugbo tungod sa grabing problema sa trapiko dinhi sa Metro Cebu.

Ang mga molupyo sa habagatan ug amihanang Sugbo dili na kinahanglan nga mag-antos sa kahuot sa trapiko gikan sa Minglanilla paingon dinhi sa dakbayan ug ingon man gikan sa Consolacion paingon sa kinapusuran sa syudad.

Ang pagbalhin sa mga buhatan sa kapitolyo gawas sa dakbayan makatabang og dako pagpaluag sa trapiko dinhi sa Metro Cebu.

Dako sab ni og ikatabang pagpalambo sa ekonomiya sa kalungsoran.

Kun mabalhin ang sentro sa kagamhanan sa lalawigan  siguradong mosunod ang mga negosyo nga moresulta sa pagsulbong sa ekonomiya dili lang sa Balamban kun dili lakip na sa silingan niining mga lungsod.

Usa sa posibleng maglumba pagsunod mao ang mga developer alang sa mga housing projects ug mga dagkong balay patigayon.

Ug tingali panahon na sab nga ikonsiderar sa nasudnong kagamhanan ang pagbutang og modernong mass transportation system sama sa train nga magdugtong sa kalungsuran ug sa dakbayan sa Sugbo.

GWEN GARCIA
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with